Ақтөбеде қызметкер жұмыс берушісінен 5 млн теңге өндіріп алды

Ақтөбеде қызметкер жұмыс берушісінен 5 млн теңге өндіріп алды, - деп хабарлайды Massaget.kz тілшісі.

Ақтөбе қаласының №3 сотына қызметкер жұмыс берушісінен 5 млн теңге моральдық зиянды өндіру туралы талап қою арызымен жүгінді.

Іс құжаттарына сәйкес, талап қоюшы 2022 жылдан бері шахтада бекіткіш қызметін атқарған. Өз жұмысын атқарып жатқан кезде, тау массасы кенжардан табиғи бөліну арқылы талап қоюшының үстіне құлап, ол есінен танып қалған.

Жазатайым оқиға салдарынан жұмысшы ауыр жарақат алып, оған ота жасалып, ІІІ топтағы мүгедектік белгіленген. Еңбек қызметіне байланысты жазатайым оқиға туралы актісіне сәйкес, жұмыс берушінің 80 пайыз кінәсі және талап қоюшының 50 пайыз еңбекке қабілеттілігінен айырылу дәрежесі анықталды.

Сот жазатайым оқиға нәтижесінде талап қоюшының денсаулығына елеулі зиян келтірілгенін, алған жарақаттың ауырлығын, алдағы уақытта ота жасалуымен жоғалған денсаулықты қалпына келтіру бойынша оңалту курстарын ескеріп, талап қоюшының талабын толық көлемде қанағаттандырды.

Жұмыс берушіден талап қоюшының пайдасына 5 млн теңге мөлшерінде моральдық зиян өндірілді.

Сот шешімі заңды күшіне енді.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!