Ақтөбе тұрғыны криптовалютадан ақша тапқысы келіп, алаяқтардың құрбаны болды
![Ақтөбе тұрғыны криптовалютадан ақша тапқысы келіп, алаяқтардың құрбаны болды](/userdata/news/news_83820/image_l.jpg)
Ақтөбеде криптовалютадан ақша тапқысы келген жас жігіт алаяқтың құрбаны болды, - деп хабарлайды Massaget.kz тілшісі облыстық полиция департаментінің баспасөз қызметі.
Полиция мәліметінше, кезекші бөлімге 21 жастағы қала тұрғыны хабарласып, белгісіз біреудің алаяқтық жолмен ақшасын иемденгенін айтып арызданған. Жәбірленуші Telegram-дағы арнадан криптовалюта табысы туралы хабарландыру тапқанын жеткізген.
"Сатушы мен сатып алушы мессенджер арқылы сөйлескен. (Криптовалюта) сатушысы жас жігітке ақша аударғаннан кейін бірден 2 еселенген соманы алатынын айтып сендірген. Олар қала сыртында кездесіп, жәбірленуші 3 миллион теңгесін күдіктіге өзі берген. Алайда ақша алғаннан кейін сатушы байланысқа шықпаған", - деп жазылған хабарламада.
Осы факт негізінде Қылмыстық кодекстің 190-бабы 1-бөлігі ("Алаяқтық") бойынша соталды тергеп-тексеру басталды.
Тәртіп сақшылары крипто-алаяққа сенбеуге, танымайтын адамға ақша бермеуге кеңес береді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова