Ақтөбе облысында мектеп директоры әйелі мен қызын бірнеше жерден пышақтаған
![Ақтөбе облысында мектеп директоры әйелі мен қызын бірнеше жерден пышақтаған](/userdata/news/news_73063/image_l.jpg)
Ақтөбе облысының Шалқар ауданында 6 қазанға қараған түні қанды оқиға болды. Ауыл мектебінің директоры өз үйінде әйелі мен қызын бірнеше жерден пышақтаған, - деп хабарлайды "Астана" телеарнасы.
Телеарна мәліметінше, жүкті әйелі мен сегіз жасар қызы пышақ жарақатынан зардап шеккен. Қанды оқиғаға не себеп болғаны белгісіз. Полиция ер адамды дереу қамауға алып, тергеу жұмыстарын бастады.
"Шалқар облыстық Полиция департаменті Қылмыстық кодекстің 99-бабы "Адам өлтіруге оқталу" бойынша қылмыстық іс қозғады. 37 жастағы күдікті ұсталып, уақытша ұстау изоляторына қамалды. Құқық қорғау шаралары аясында өзге мәліметтер жария етілмейді", - деді ПД Ақтөбе облысы бойынша баспасөз қызметінің жетекшісі Ерболат Сарқұлов.
Облыстық білім басқармасы өкілдері ер адам мектеп директоры болып жарты жыл жұмыс істегенін, бұған дейін аудандық білім бөлімінде қызмет атқарғанын айтты. Ол оқиғадан кейін бірден жұмыстан шығарылған.
"Ол қарапайым отағасы, жақсы жұмысшы ретінде көрінетін. Сәуір айына дейін аудандық білім бөлімінде әдіскер қызметін атқарды. Сәуір айынан бастап мектеп директоры болып тағайындалды. 6 қазанда жұмыстан босатылды", - деді Ақтөбе облысы білім басқармасының басшысы Жолдас Бытырхан.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова