Ақтөбе облысында ауыл әкімі пышақталған - БАҚ
![Ақтөбе облысында ауыл әкімі пышақталған - БАҚ](/userdata/news/news_75603/image_l.jpg)
Ақтөбе облысы Алға ауданы Қарабұлақ ауылының әкімі қаза тапты, - деп хабарлайды Аikyn.kz.
Басылым мәліметінше, аудан әкімі пышақ жарақатынан қаза тапқан. Облыстық денсаулық сақтау департаменті мәліметінше, ер адам пышақ жарақатын алып, көп қан жоғалтқан. Басылым мәліметінше, ол аудандық ауруханаға жеткізілген кезде қайтыс болған.
ІІМ баспасөз қызметі мәліметінше, 12 желтоқсанда сағат 00.50-де Ақтөбе облысы Алға аудандық полиция бөлімінің 102 нөміріне шаруа қожалықтарының бірінде кісі өлтіру оқиғасы болғаны туралы хабарлама түскен.
"Тергеу-жедел тобы шаруа қожалығының басшысы мен 36 жастағы ер адам арасында жанжал болғанын анықтады. Жанжал барысында фермер жәбірленушінің ішіне пышақ жарақатын салды. Осы оқиға салдарынан 36 жастағы ер адам қайтыс болды", - делінген ІІМ хабарламасында.
Осы дерек бойынша ҚР Қылмыстық кодексінің 99-бабының 1-бөлігі бойынша соталды тергеу басталған. Қажет сараптамалар тағайындалған, күдікті уақытша ұстау изоляторына қамалған.
Алға ауданы әкімдігі сайтында Қарабұлақ ауылдық округінің әкімі Ернар Махамбетов екені жазылған. Ол 36 жаста, Ақтөбе облысының Алға ауданында дүниеге келген.
2003 жылдан 2007 жылға дейін Махамбет Өтемісов атындағы Батыс Қазақстан мемлекеттік университетін "Кеден ісі" мамандығы бойынша бітірген.
Еңбек жолын 2012 жылы Ақтөбе облысы Мұғалжар ауданы Ақкемер ауылдық округінің жетекші маманы болып бастаған. 2014 жылы "Ақкемер ауылдық округі әкімі аппараты" ММ бөлім меңгерушісі болған. 2019 жылғы 2 сәуірде Алға ауданы Қарабұлақ ауылдық округінің әкімі болып тағайындалған.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова