Ақтаудағы ұшақ апаты: Тоқаевтың тапсырмасымен комиссия құрылды

Мемлекет басшысы Қасым-Жомарт Тоқаев Ақтаудағы жағдайға байланысты тапсырма берді, - деп хабарлайды Massaget.kz тілшісі.

Президенттің тапсырмасы бойынша арнайы комиссия құрылды. Оны вице-премьер Қанат Бозымбаев басқарады.

Қасым-Жомарт Тоқаев Ақтауға Астанадан дәрігерлерді жіберуді және зардап шеккендерге барлық қажет көмекті көрсетуді тапсырды.

Сонымен қатар, Үкіметтің қаулысымен Ақтау қаласы әуежайы маңында Az Airlines әуе компаниясының Эмбраер 190 ұшағының апатқа ұшырау себептерін тергеу үшін Үкіметтік комиссия құрылды. Тиісті қаулыға премьер-министр Олжас Бектенов қол қойды.

Комиссия құрамына премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.

Комиссияға оқиға орнына дереу бару, ұшақтың құлау себептерін жан-жақты тергеуді қамтамасыз ету, қаза тапқандар мен зардап шеккендердің отбасыларына шұғыл көмек көрсету шараларын қабылдау тапсырылды.

Қазақстан Үкіметі оқиға себептерін жан-жақты тергеу және шұғыл көмек көрсету бойынша Әзербайжан Үкіметімен бірлесіп жұмыс істеп жатыр. 

Ақтаудағы ұшақ апаты туралы не белгілі?

Еске салайық, 25 желтоқсанда Ақтау маңында ұшақ апатқа ұшырады. Ұшақ Бакуден Грозныйға ұшып бара жатқан.  Бұл ұшақ Azerbaijan Airlines авиакомпаниясына тиесілі. 

Кейінірек Төтенше жағдайлар департаменті оқиға орнына барды. Құтқарушылар жеткен кезде ұшақ өртеніп жатқаны анықталды.

Қазақстанның Көлік министрлігі де төтенше жағдайға байланысты мәлімдеме жасады. 

Өзекті жаңалықтарды өз уақытында оқу үшін Facebook парақшамызға жазылыңыз!