Ақтауда тұрғын үй кіреберісінің төбесі опырылды: жазатайым оқиға кезінде кім қаза тапқаны белгілі болды
![Ақтауда тұрғын үй кіреберісінің төбесі опырылды: жазатайым оқиға кезінде кім қаза тапқаны белгілі болды](/userdata/news/news_83217/image_l.jpg)
Ақтау әкімдігінің тұрғын үй инспекциясы өкілі тұрғын үйдің кіреберісінің төбесі құлаған оқиға туралы тың деректер айтты, - деп хабарлайды Massaget.kz тілшісі.
11 мамырда 9-шағынаудандағы үйлердің бірінде кіреберістің бетоны құлады. Төтенше жағдай салдарынан бір ер адам қаза тауып, тағы екеуі зардап шекті.
"9-шағынаудан, 4-үй мекенжайындағы кіреберісті бөлшектеу бойынша жоспарлы жұмыстар барысында бетон құлады. Өкінішке қарай, бір адам қаза болды, тағы екеуі жарақат алып, ауруханаға жеткізілді. Олардың бәрі - "Нестле Мол" сервис компаниясының қызметкерлері, олар "Татьяна" пәтер иелерінің кооперативіне қызмет көрсетті", - деді Tengrinews.kz-ке Ақтау әкімдігінің тұрғын үй инспекциясы өкілі.
Болған оқиғаның мән-жайы анықталып жатыр. Жергілікті жерде Төтенше жағдайлар департаменті қызметкерлері жұмыс істеп жатыр.
"Марқұмның отбасына көңіл айтамыз", - деді қала әкімдігінің тұрғын үй инспекциясы өкілі.
Еске салайық, бұған дейін Ақтауда кіреберіс шатыры құлап, бір адам мерт болғаны, зардап шеккендер бар екені хабарланған болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова