Ақтауда полиция бомба туралы жалған хабар таратқан күдіктіні ұстады - деп хабарлайды Massaget.kz тілшісі Polisia.kz.
"16 қаңтар сағат 04:15 шамасында полицияға Ақтау қаласының 33-шағын ауданында орналасқан №33 мектепте бомба қойылғаны туралы ақпарат келіп түсті. Оқиға орнына дереу жеткен облыстық полиция департаментінің кинологтары мен полиция қызметкерлері мектеп ғимараты мен оның айналасын мұқият тексеріп, қауіпті заттардың бар-жоғын анықтады", - деді полиция департаментінің баспасөз қызметі.
Нәтижесінде ешқандай жарылғыш зат табылмады. Жедел-іздестіру шаралары барысында 30 жастағы бұрын бірнеше рет сотталған күдікті ұсталды. Қазіргі уақытта ол уақытша ұстау изоляторына қамалған. Қылмыстық іс Қазақстан Республикасы Қылмыстық кодексінің 273-бабына сәйкес жүргізіліп жатыр. Полиция жалған хабарламалар төтенше қызметтерді негізсіз алаңдатып, қоғам қауіпсіздігіне қауіп төндіретін ауыр құқықбұзушылық екенін еске салады.
Аптаның басты оқиғалары мен пайдалы видеоларды көру үшін YouTube арнамызға жазылыңыз
А. Бақдаулет