Ақтауда 14 жастағы жасөспірімнің қатыгездікпен соққыға жығылғаны туралы ақпарат тарады. Бұл туралы жергілікті тұрғын Ақтоты Ахметқызы мәлімдеді, - деп хабарлайды Massaget.kz тілшісі "Lada.kz"-ке сілтеме жасап.
Ақтоты Ахметқызының айтуынша, оқиға 4 тамыз күні таңертең 32А шағынауданындағы №10 үйдің маңында болған. Дүкенге шыққан оның 14 жастағы інісіне шамамен 16-17 жастағы екі жасөспірім жақындаған.
Оның сөзінше, күдіктілер жасөспірімнен телефоны арқылы сол үйде тұратын досына қоңырау шалып, сыртқа шығуын талап еткен. Алайда ол бас тартқан.
Содан кейін, қыздың айтуынша, жасөспірімдер баланы соққыға жығып, болған жағдайды оның ұялы телефонына түсіріп алған. Кейін видеоны досына жіберіп, «Егер шықпасаң, досыңның жағдайы осылай болады» деген мазмұнда хабарлама жолдаған.
– Бұл адамшылыққа жат әрекет. Мұндай қатыгездік ертең одан да ауыр қылмысқа ұласуы мүмкін, – дейді Ақтоты Ахметқызы.
Оқиғадан кейін күдікті жасөспірімдер аналарының қатысуымен полицияның тірек пунктіне жеткізілген. Алайда жәбірленуші тараптың айтуынша, олар кінәларын мойындамаған.
Ақтоты Ахметқызының сөзінше, полиция қызметкерлерінің көзінше жасөспірімдердің бірі өзінің баланы ұрғанын айтып, қажет болса тағы да соғуы мүмкін екенін мәлімдеген.
Зардап шеккен жасөспірім Маңғыстау облыстық балалар ауруханасына жеткізілген. Дәрігерлер оған компьютерлік томография және басқа да тексерулер жүргізген. Тексеру қорытындысы бойынша бала басынан ауыр жарақат алып, шұғыл түрде ауруханаға жатқызылған.
Сонымен қатар қыз полицияның тірек пунктінде олардың арызы бірден қабылданбағанын, бірнеше сағаттан кейін ғана қалалық полиция басқармасына ресми түрде арыз түсіре алғандарын айтты.
Жәбірленуші тарап полиция, прокуратура, денсаулық сақтау басқармасы мен әкімдіктен бұл істі ерекше бақылауға алып, кінәлілерге заң аясында қатаң шара қолдануды сұрады.
Қазіргі уақытта оқиғаның мән-жайы анықталып жатыр.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова