Желіде Ресей президенті Владимир Путиннің бортын еліміздің аспанында әскери ұшақтар алып жүрген сәттің кадрлары тарады, - деп хабарлайды Massaget.kz тілшісі.
Видеоны Мемлекет басшысының қызметі туралы ресми медиа-ресурс бөлісті.
"Ресей Президентінің бортын еліміздің аспанында әскери ұшақтар алып жүрген сәттен кадрлар. Сондай-ақ олар Астана аспанын РФ президенті Владимир Путиннің мемлекеттік сапарының құрметіне Ресей туының түстерімен бояды", - делінген хабарламада.
27–28 қараша күндері Ресей президенті Владимир Путин Қазақстанда мемлекеттік сапармен болады. Ресей президентін әуежайдан Тоқаевтың өзі күтіп алды. Сондай-ақ кәсіби суретші Әсел Сабыржанқызы Владимир Путин Астанаға ұшқан сәтте сала бастаған картинасын таныстырды.
Мемлекеттік сапар аясында Қасым-Жомарт Тоқаевпен келіссөздер өтеді. Кездесуде Ресей мен Қазақстан арасындағы стратегиялық әріптестік пен одақтастықты әртүрлі салаларда одан әрі дамыту мәселелері, соның ішінде Қазақстанның ҰҚШҰ-ға, Ресейдің Тәуелсіз Мемлекеттер Достастығы мен БРИКС-ке биылғы төрағалығы аясында ынтымақтастық мәселелері талқыланып, бірқатар маңызды құжаттарға қол қойылады.
Аптаның басты оқиғалары мен пайдалы видеоларды көру үшін YouTube арнамызға жазылыңыз