Ақмола облысында 40 жыл бұрын ұрланған револьвер табылды

Ақмола облысының криминалисі 40 жыл бұрын ұрланған револьвердің маркировкалық нөмірін анықтады, - деп хабарлайды Massaget.kz тілшісі polisia.kz-ке сілтеме жасап.

2023 жылдың соңында Ақмола облысында зауыттық нөмірлері жойылған, антикварлық қаруға жататын, 1914 жылы басып шығарылған Наган револьвер жүйесі табылды.

Бірнеше ай өткеннен кейін револьвер Ақмола облысының полиция департаменті ЖКБ бас криминалисі Аян Имағанбетовтің қолына түсті.

Аян Имағанбетов қарудың әрбір бөлшегін бөлшектеп қарап, револьверді мұқият зерделей бастады. Оның кәсіби көзқарасы револьвердің маркировкалық нөмірін табуға көмектесті.

ІІМ есептері бойынша тексеру кезінде бұл қарудың Қызылорда облысының аумағында 1981 жылы ұрланғаны белгілі болды. Енді полиция қызметкерлерінде револьвердің басқа өңірге қалай жеткенін, оны қолданып, 40 жыл бұрын қандай қылмыс жасалуы мүмкін екенін анықтау міндеті тұр.

Аптаның басты оқиғалары мен пайдалы видеоларды көру үшін YouTube арнамызға жазылыңыз