Әкім орынбасарлары жұмыс уақытында ішімдікпен ұсталған: жаңа дерек белгілі болды

Мемлекеттік қызмет істері агенттігінің Жетісу облысы бойынша департаменті Кербұлақ ауданы әкімінің орынбасарларына қатысты видеоға пікір білдірді, - деп хабарлайды Massaget.kz тілшісі.

Бұған дейін әлеуметтік желіде Кербұлақ ауданы Сарыөзек ауылының тұрғыны түсірген видео пайда болған еді. Ол кезде кадрларда бірнеше ер адамның жұмыс уақытында мекемелердің бірінде үстел басында отырғаны көрсетілген. Әйелдің айтуынша, жазбада Жетісу облысы Кербұлақ ауданы әкімінің екі орынбасары мен Алматы облысы депутаттарының бірі түсірілген.

Жария болғаннан кейін іске Жетісу облысы бойынша Мемлекеттік қызмет істері агенттігінің қызметкерлері араласқан. Олар аудан әкімдігі қызметкерлерінің әрекеті мемлекеттік қызметшілердің этикалық талаптарын бұзу ретінде қарастырылғанын хабарлады.

"Қазақстан Республикасы мемлекеттік қызметшілерінің Әдеп кодексі" талаптарын бұзғаны үшін Кербұлақ ауданы әкімінің орынбасарларына қатысты тәртіптік іс қозғалды және қызметтік тергеулер жүргізіліп жатыр. Нәтижелер Жетісу облысының Әдеп жөніндегі кеңесінің кезекті отырысында қаралады", - деп хабарлады облыстың Мемлекеттік қызмет істері агенттігінің департаменті.

Бұл ретте департамент видеоға түсіп қалған мемлекеттік қызметкерлердің аты-жөнін көрсетпеді.

Instagram парақшамызға жазылып, ең қызықты ақпараттарды бірінші болып оқыңыз!