"Әкем мектеп бітірген күні Алматыға оқуға алып кетті". Ләйлә Сұлтанқызы қыз алып қашуға қатысты ойын айтты

Танымал тележүргізуші Ләйлә Сұлтанқызы қыз алып қашуға қатысты ойын айтты, - деп хабарлайды Massaget.kz тілшісі.

Оның сөзінше, әкесі де кезінде қызын алып қашудың құрбаны болар деп қорқып, Алматыға оқуға түсірген екен.

"Алып алып, қашу деген болмайды. Бір қызық оқиға есіме түсіп тұр. Кезінде қызы мен анасы келіскен ғой "егер сені еркіңнен тыс алып қашса, сенен өз еркіммен келдім деген қолхат алатын болса, 3 леп белгісін қой, ал егер шын сүйіп қосылсаң 1 леп белгісін қой" деген екен. Сөйтіп, әлгі қызды аяқ астынан танымайтын жігіт алып қашып, қолхат алып, оны қуғыншыларға берсе, ана хаттың соңында 3 леп белгісі тұр екен. Оны көрген анасы қызын алып қайтыпты. Өмірде болған жағдай". Бүгін алып қашудың жазасы күшейтілетінін оқып, есіме өз әкем түсіп отыр. 16-ға тола салып, жалғыз қызын алып қашып кетер деп уайымдап, мектеп бітірген күні Алматыға оқуға алып кетті. Сол кезде көрші-қолаңның қыздары бірінен соң бірі күйеуге (өз еркімен, еркінен тыс) тиіп жатты. Әкем сонда, бастысы өмірдегі орнын дұрыс тапсын деп уайымдаған ғой", - деп жазған ол.

Сондай-ақ, Ләйлә Сұлтанқызы бұрын қоғамда әжелердің табалдырыққа жатып алып, қызды жібермеуі секілді әрекеттері қалыпты көрінгенін айтады.

"Алып қашу, қинап қалдыру, әженің табалдырыққа жатуы, бауырсақ шашуы сияқты трюктар жасайтын сонда. Қалыпты жағдай деп те ойладық қой соны біз. Ол кезде үндемеді емес, арызданушылар да болды. Оның өзін тек жүрек жұтқандар, ұятты ысырып қойғандар ғана жасады. Қазір ешкім мұндай трюктерді жасамас. Ұлдар да, қыздар да ақылды деп ойлаймын", - дейді журналист.

Посмотреть эту публикацию в Instagram

Публикация от Ләйлә Сұлтанқызы (@sultankyzy)

Желі қолданушылары да алып қашу дұрыс емес екенін айтып, оның пікірін қолдаған.

"Алып қашу дұрыс емес! Заң күшейтілсін! Жігіт пен қыз келісіп жасалса, түсінуге болады", "Дұрыс, ақыл тоқтатып тұрмыс құрғаны, ажырасу азаяды", "Алып қашудың да түрлері бар, өз еркімен сүйгеніне кетсе әңгіме басқа, ал танымайтын адам еріксіз алса - ол қылмыс", - деп жазған олар.

Еске салайық, бұған дейін Қазақстанда қыз алып қашуға қатысты жаза күшейтілетіні хабарланған еді. 

Қызықты жаңалықтар мен видеоларды көру үшін TikTok арнамызға жазылыңыз!