Абай облысында 2,5 миллион теңгені өзіне аударып алған балабақша есепшісі сотталды

Абай облысында балабақша есепшісі 2,5 миллион теңгеден астам қаржыны қалтаға басқан, - деп хабарлайды Massaget.kz тілшісі polisia.kz-ке сілтеме жасап.

Абай облысына қарасты Жарма ауданында балабақша есепшісі 2,5 миллион теңгеден астам қаражатты өзіне заңсыз аударған.

Белгілі болғандай, есепші мекеме басшысының электрон цифрлық қолтаңбасына қол жеткізе отырып, оның көмегімен ақшалай қаражатты есептеу және аудару бойынша барлық қаржылық операцияларды жүзеге асырған.

Onlinebank HALYK бағдарламасы арқылы жалған электрондық төлем шоттарын жасаған. Әйел өзінің лауазымын асыра пайдаланып, 3 жыл бойы осы әдіспен өз есепшотына ақша аударып жүрген. Осылайша, қылмыстық әрекеттердің салдарынан есепші балабақшаға жалпы сомасы 2,5 миллион теңге көлемінде материалдық шығын келтірді.

Қазіргі уақытта есепші өзінің кінәсін толық мойындады және мемлекетке келтірген материалдық залалды өтеді. Осылайша сот заттай дәлелдемелерге сүйене отырып, сотталушыны кінәлі деп танып, 2 жыл 6 ай бас бостандығынан айыру және өмір бойына мемлекеттік қызметте қызмет ету құқығынан айыру түрінде үкім шығарды.

Әйелдің 14 жасқа толмаған 3 баласы бар болғандықтан ҚР ҚК-нің 74-бабының 1-бөлігіне сәйкес, бас бостандығынан айыру түріндегі тағайындалған жазаны орындау 5 жылға кейінге қалдырылды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!