Instagram әзірлеушілері қолданушылар сынынан кейін платформадағы жаңартуларды тоқтата тұруды шешті, - деп хабарлайды Massaget.kz.
Кейінгі аптада Instagram суреттерге қарағанда, видео мазмұнына басымдық беретін экран нұсқаны сынай бастады. Онда видеолар смартфон экранына толық шығады. Бұл Желіні қысқа видеолар түсіріп, көруге арналған TikTok-қа ұқсатып жібереді.
Қолданушылар Instagram-ның жаңа дизайнына көңілі толмай, қолданбаны аз пайдаланған. Сын әлеуметтік желі басшылығына қарсы ең үлкен акциялардың біріне айналды. Желіде фотограф Тати Бреннингтің "Make Instagram Instagram Again" (Instagram-ды қалпына келтіріңдер) деген жазуы бар суреті тарап кетті. Осылайша, петиция құрылып, акция басталған.
Ең танымал парақшалар тізімінде 2 және 7-орындарды иеленген Кайли Дженнер мен Ким Кардашьянның жазбаны бөліскені назар аудартты.
Instagram басшысы Адам Моссеридің айтуынша, жоспарланған жаңартулардан қолданушылардың теріс реакциясынан кейін бас тартуға шешім қабылдаған.
"Тәуекелге барғанымызға қуаныштымын, кейде сәтсіздікке ұшырамасақ, жеткілікті дәрежеде ойланбаймыз немесе батылдығымыз жетпейді. Бірақ міндетті түрде үлкен қадам жасап, қайта топтасуымыз керек. Көп нәрсеге үйреніп жатырмыз. Жаңа идеямен немесе итерациямен ораламыз. Сондықтан жұмыс істейміз", - деді Адам Моссери.
Оның сөзінше, әлеуметтік желіні бұрынғы форматқа ауыстыру жоспарланып отырған жоқ, бірақ сынды ескеріп, жаңа идеяларды дамытады.