26 ақпанда Қаржылық мониторинг агенттігі кең ауқымды операция жүргізді. Осылайша тұтынушылық кооператив ретінде жасырылған Buyers Union қаржы пирамидасының қызметін тоқтатты, - деп хабарлайды Massaget.kz тілшісі.
Салымшылар жылжымайтын мүлік, көлік сатып алуға және Trade in, ReFinance бағдарламаларына қатысып, инвестиция салуға үгіттелген. Сонымен қатар, кооператив жеке тұлғалардың қаражатын тартудан дивидендтер алу мүмкіндігімен менеджер болып жұмыс істеуге рұқсат берген.
"Кооперативке қатысудың міндетті шарттарының бірі өмірді сақтандыру үшін ай сайын 30 мың теңге төлеу және сатып алынатын мүліктің құнынан 10% жарна төлеу болған. Маңыздысы кооператив салымшыларға ақша алғаны туралы ешқандай құжаттар ұсынбаған, ал салым сомасы тек пайдаланушылардың жеке кабинетінде көрсетілген", - деп жазылған хабарламада.
Нәтижесінде пирамидаға 250-ден аса салымшы тартылып, 300 млн теңгеден аса қаражат салынған.
Пирамида ұйымдастырушысы екі айға қамауға алынды.
Соталды тергеу жалғасып жатыр.
Еске салайық, бұған дейін ҚМА Шымкент қаласы бойынша департаменті Nazira Gold қаржы пирамидасының қызметін тоқтатты.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова