Мельбурнде теннистен Аустралия ашық чемпионатының (Australian Open) жеребесі тартылып, қазақстандық теннисшілердің қарсыластары белгілі болды, - деп хабарлайды massaget.kz.
Қазақстанның бірінші ракеткасы Елена Рыбакина жарысты бірінші айналымнан бастайды. Алғаш болып 16 жастағы аустралиялық (WTA-да 371-орында) Эмерсон Джонспен ойнайды. Бұған дейін екі теннисші кездеспеген.
Юлия Путинцева бірінші ойынын Армения атынан шығатын Элина Авенесянға қарсы өткізеді. Екі теннисші де Ресейден шыққан. Бұған дейін 2023 жыл Бейжіңдегі WTA турнирінде кездесіп, Юлия жеңіске жеткен (6:1, 6:4).
АТР рейтингінде 33-орында тұрған Александр Бублик аргентиналық Франсиско Серундоломен (31-орын) ойнайды. Бұған дейін екеуі кортта кездеспеген.
Қазақстандық тағы бір теннисші Александр Шевченкоға әлемнің үшінші ракеткасы Карлос Алькарас (Испания) қарсылас атанды.
Australian Open-2025 жарысының негізгі кезеңі 12-26 қаңтар аралығында өтеді. Өткен жылы ерлер арасында италиялық Янник Синнер, әйелдер арасында беларусь Арина Соболенко чемпион болған.