26 қазанда Түркістан қаласында корпоративтік "Бірінші болу - батылдық" қоры ұйымдастырған төртінші Turkistan Marathon өтті. Биылғы жарысқа 20 елден келген 3 мың адам қатысты. Олардың ішінде шамамен 400 шетелдік қатысушы болды - бұл өткен жылмен салыстырғанда екі есеге жуық көп. Марафонның ең жасы үлкен қатысушысы - Щучинск қаласынан келген 91 жастағы Салиха Зигангерова болды.
Желтоқсан айында Салиха Зигангерованың жасы 92-ге толады, ал бүгін ол 10 шақырымдық скандинавиялық жүріс қашықтығын еңсерді. Қатысушы Түркістанға Щучинск қаласынан арнайы келді:
"Мен спортқа әрдайым қызығатынмын, бірақ арнайы айналыспадым. Жаяу жүргенді жақсы көретінмін, көп қозғалып, тіпті жұмысым отырып істеуді қажет етсе де. Соңғы уақытта басым жиі ауыратын болды, сондықтан денсаулығымды жақсарту үшін скандинавиялық жүріспен шұғылдана бастадым", – дейді Салиха апай.
Ең жасы үлкен қатысушылар жастарға белсенді болуды және кем дегенде күн сайын жаяу жүруді ұсынады.
"Біздің ең жасы үлкен қатысушыларымызды әрқашан қуана қарсы аламыз. Олар өз үлгісімен басқаларды шабыттандырады және спорт, тәртіп пен денсаулыққа жауапкершілік арқылы қандай жетістікке жетуге болатынын көрсетеді. Біздің жүгіру шараларымыз жасқа және физикалық мүмкіндіктерге қарамастан, барлығына ашық", – деді "Бірінші болу - батылдық" корпоративтік қорының атқарушы директоры Салтанат Қазыбаева.
Қор ұйымдастыратын әр жарыста ең төзімді, тәжірибелі қатысушыларды кездестіруге болады. Көпшілігі жастайынан емес, 40 жастан кейін спортты өмірінің бір бөлігіне айналдырған. Дұрыс жаттығу мен режим болса, бастаудың ешқашан кеш еместігін дәлелдеп келеді.
Айта кетейік, 26 қазанда өткен төртінші Turkistan Marathon жарысына 20 елден 3 000 адам қатысты. Ең көп қатысушы елдер қатарында Қырғызстан (147 адам), Өзбекстан (109) және Ресей (72) бар. Сонымен қатар Азия және Тынық мұхиты аймағынан (12), Еуропадан (16), Солтүстік және Латын Америкасынан (4), Африкадан (3) және Таяу Шығыстан (2) қатысушы келді.
Биыл жарыс жолымен үш рекордтың барлығын өзбекстандық спортшылар орнатты. Андрей Петров марафондық 42,2 км қашықтықты 2 сағат 16 минут 58 секундта жүгіріп өтті. Әйелдер арасында Екатерина Тунгускова 2 сағат 40 минут 45 секунд нәтижесімен жаңа рекорд орнатты. Ал Алишер Ахматалиев 10 км қашықтықты 30 минут 31 секундта бағындырды.
Жыл басында Turkistan Marathon ұзақ қашықтықтағы алғашқы түркілік серия - Turkic Alliance of Long Runs (TAN) құрамына кірді. Альянстың 35 марафоншысы Түркістанда мәреге жетіп, түркі әлемі бойынша өз жүгіру саяхатын жалғастыруда. TAN сериясының бес жарысын еңсерген қатысушылар ерекше медаль мен өмір бойы ұмытылмас әсерге ие болады.
Серіктестік материал