Ақтөбеде бүйрегін сатпақ болған ер адам сотталып кетті, - деп хабарлайды Massaget.kz тілшісі.
Ақтөбе қаласының № 2 сотында тірі адамның ағзалары мен тіндеріне қатысты заңсыз мәмілелер жасауға оқталды деген айыппен У-ға қатысты қылмыстық іс қаралды.
Оқиға қалай болған?
Сотталушы У. 2024 жылғы маусымда тұрақты табыс көзі жоқ жұмыссыз болып, өзінің бір бүйрегін Telegram арна арқылы сататыны туралы хабарландыру жариялаған. Бір бүйректің құнын 9 000 000 теңгеге бағалаған.
2024 жылы қыркүйекте хабарландыруға құқық қорғау органдарымен байланыста болған куәгер Б. жауап берген. Олар У-дан бір бүйректі сатып алу туралы келісімге келген. Қажет медициналық тексерістен өткеннен кейін сотталушы куәгерден 5 000 000 теңге алған кезде ұсталды.
Сот үкімі
Сот отырысында сотталушы өз кінәсін толық мойындады.
"У. ҚК-нің 24-бабының 3-бөлігі 116-бабының 1-бөлігі бойынша кінәлі деп танылып, оған 1 жылға бас бостандығынан айыру түріндегі жаза тағайындалды. ҚК-нің 63-бабы ережелерін қолдана отырып жазаның барлық белгіленген мерзіміне пробациялық бақылау тағайындаумен жаза тағайындалды", - деп жазылған хабарламада.
Сот үкімі заңды күшіне енген жоқ.
Қызықты жаңалықтар мен видеоларды көру үшін TikTok арнамызға жазылыңыз!
Ж. Қадыржанова