49 жастағы ер адам бірге тұратын әйелін пышақтап өлтірген
![49 жастағы ер адам бірге тұратын әйелін пышақтап өлтірген](/userdata/news/news_97176/image_l.jpg)
Ақтөбе облысында 49 жастағы ер адам бірге тұратын әйелін пышақтап өлтірген. Көз жұмған әйелдің туыстары бұған дейін марқұм соққыға жығылып жүргеніне шағымданғанын айтты. Тіпті әпкесі оған бірге тұратын ер адамды тастап, ауылдан қалаға көшуді ұсыныпты, бірақ ол бас тартқан. Нәтижесінде отбасылық жанжал қайғылы жайтпен аяқталды, - деп хабарлайды Massaget.kz тілшісі "Диапазон" басылымына сілтеме жасап.
Қылмыс Мәртөк ауданы Дмитриевка ауылында болды. 49 жастағы шаруа қожалығының малшысы жұмыстан кейін үйіне оралған. Кейін ол бірге тұратын әйелімен арақ ішіп, ұрысып қалған. Ер адам алдымен оның басы мен бетінен бірнеше рет ұрған, содан кейін пышақты кеудесіне сұққан. Әйел алған жарақатынан сол жерде қаза тапқан.
Сотталушының сөзінше, әйел сол күні кешке арақ сатып алуды талап еткен, тіпті бірінші болып пышақты алған. Ер адам пышақты әйелдің қолынан тартып алуға мәжбүр болғанын жеткізді. Оның сөзінше, пышақ жарақатынан кейін әйел ұйықтап қалған, кейін темекі шегуге шыққан. Ал түнде Ақтөбе облысының тұрғыны әйелді бөлмеде жерде жатқан жерінен тапқан.
Сотталушы бұған дейін сотталған, бірнеше рет әкімшілік жауапкершілікке де тартылған. Сот айыпталушының кісі өлтіру ниеті болмағаны туралы дәлелдерін негізсіз деп таныды.
Сонымен қылмыстық істер жөніндегі мамандандырылған ауданаралық сот ер адамды 12 жылға бас бостандығынан айырды. Ол ең жоғары қауіпсіздік колониясында мерзімін өтейді. Үкім заңды күшіне енген жоқ.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова