300-ден астам қазақстандық кәсіпорын ЭКСПО нысандарының құрылысына және оған дайындыққа ат салысуда

ЭКСПО көрмесінің құрылысына және оған дайындыққа 300-ден астам қазақстандық кәсіпорын ат салысуда, деп мәлімдеді «Астана ЭКСПО-2017» Ұлттық компаниясы» АҚ басқарма төрағасы Ахметжан Есімов павильондарды тапсыру салтанаты барысында. Бұл туралы primeminister.kz сайты хабарлады.

«Бүгін біз үшін атаулы күн – көрменің 5 басты нысанының құрылысы аяқталды: халықаралық павильондар, 1 374 орындық ЭКСПО-қалашық, ЭКСПО-кеңсе,  ішкі істер бөлімі және Энергияны зерттеу орталығы ғимараттары. Бұл нысандардың жалпы көлемі 482 мың шаршы метрді құрап отыр», - деді А. Есімов.

Ұлттық компания басшысы айтып өткендей, жоба Елбасының жан-жақты қолдауының арқасында  дағдарысқа қарсы нәтижелі бағдарламалардың біріне айналды.

«Осылайша, көрменің  құрылысы мен дайындығына еліміздің барлық өңірлерінен 300-ден астам отандық кәсіпорын ат салысуда. Бұл жоба 50 мыңға жуық жұмыс орнын сақтауға мүмкіндік берді. Осы құрылыс алаңының өзінде 14 мың адам жұмыс істеп жатыр», - деп мәлімдеді А. Есімов.

Компания басшысының айтуынша, нысандар құрылысы кезінде 492 млрд теңге сомаға жұмыстар жасалып, қызмет көрсетілді.

«Көрменің өзге нысандары бойынша  құрылыс  жұмыстары кестеге сәйкес жалғасуда.  Ол – «Сфера» ұлттық павильоны, конгресс-орталық және қонақ үй. Келесі жылы қоғамдық аймақтарды ұйымдастыру, аумақты абаттандыру жұмыстары жүргізіледі», - деді А. Есімов.

Еске салсақ, ЭКСПО-2017 халықаралық көрмесінің ұйымдастырушылары алғашқы бес ел - Мажарстан, Германия, Қытай, Түркия, Францияға павильондарын тапсырған болатын.