“3 жылға сотталды“. Марқұм Салтанат Нүкенованың анасы ел білмеген сырын ашты

Марқұм Салтанат Нүкенованың анасы Жұмагүл Нүкенова танымал журналист Дана Нұржігітке берген сұхбатында өзінің желтоқсаншының әйелі екенін айтты, - деп хабарлайды Massaget.kz тілшісі.

Оның сөзінше, күйеуі Амангелді Нүкенов Желтоқсан оқиғасының ұйымдастырушыларының бірі болған.

"Күйеуім Амангелді екеуміз Целиноград ауыл шаруашылық институтына бірге түстік. Жыл соңында үйленеміз деп шештік. Желтоқсанда ата-анамызды таныстыру үшін Павлодарға бару керек болдық, ол сол үшін менің куәлігімді алып, екеумізге ұшаққа билет алды. Дәл 16-17 желтоқсанда осы қайғылы оқиға болады. Сөйтсек, Амангелді Желтоқсан оқиғасын ұйымдастырушылардың бірі екен, ол 5 институтты көтеріп, "басшы неге қазақ емес?" деген жазулармен плакаттар дайындаған. 20 желтоқсанда маған достары Павлодарға билетпен бірге, оның ұсталғаны жайлы қағазды әкеліп берді. Сот болды. Сот барысында оны ұйымдастырушылардың бірі ретінде 3 жылға бас бостандығынан айыру туралы шешім шығарды. Бірақ олар Астанада біраз уақыт болды, сол кезде анасы мен ағалары Жоғарғы сотта болып, Колбинге барып, өтініш білдірген, тіпті Олжас Сүлейменовпен кездескен. Оның ағасы өте сауатты кісі еді, түрлі хат жазып, ол үшін күресіп, соның арқасында жазасы жеңілдетілді, ол қоныс колониясына ауыстырылды", - деді ол.

Жұмагүл Нүкенова күйеуі жазасын өтеп жатқанда оны көруге барып тұрғанын айтады. 

"Осы жағдайлар болып жатқан кезде менің аяғым ауыр еді, сөйтіп 1998 жылы тұңғышымды босанғанда ол жанымда бола алмады. Ол жазасын өтеп жатқанда мен оны күттім, кейін оны Павлодарға ауыстырған кезде кішкентай ұлыммен бірге оны көруге барып тұрдық. Менің әкем педагог. Ол маған қолдау білдіріп, "қайсар жігіт екен, қанша күту керек болса, сонша күтесің" деді. Әкем мені үнемі желтоқсаншының әйелі деп шақыратын", - деді.

Бір жыл бұрын 9 қарашада Салтанат Нүкенова қайтыс болды. Оның өлімі қазақстандықтарды ғана емес, өзге елдерді де дүр сілкіндірді, - деп хабарлайды Massaget.kz тілшісі.

Айта кетейік, Салтанат Нүкенованың өлімі кейінгі жылдардағы Қазақстандағы ең атышулы істердің бірі болды. Бұл трагедия елдегі тұрмыстық зорлық-зомбылық мәселесін ашық көрсетті.

Бишімбаев пен Нүкенованың таныстығы

Бұрынғы ұлттық экономика министрі Қуандық Бишімбаев пен Салтанат Нүкенова 2022 жылы тамызда танысқан. Сол жылы желтоқсанда олар мұсылманша неке қиған. Алайда ресми некеге отырмады.

Салтанаттың жақындарының айтуынша, Бишімбаев оның жұмыс істеуіне тыйым салып, кімдермен араласатынын бақылап, туыстарымен, достарымен байланысын шектеген.

Оқиға болған күн

2023 жылы 8 қарашада кешке ерлі-зайыпты Дима Биланның Астанадағы концертіне барған. Концерт кезінде олардың арасында жанжал шығып, олар концерт аяқталмай жатып, Бишімбаевтың туысына тиесілі Bau мейрамханасына барған. Онда жанжал жалғасып, физикалық күш көрсетуге ұласқан.

Іс материалдарына сәйкес, Бишімбаев Нүкенованы қорлап, сыйлықтарын және сатып алып берген киімдерін айта бастаған. Бұған жауап ретінде Салтанат зергерлік бұйымдар мен киімдерін шешіп тастап, ішкиіммен қалған, бұл Бишімбаевты одан әрі ашуландырған.

Бишімбаев Нүкеноваға былапыт сөздер айтып, басын, денесін жұдырықтаған. Салтанат дәретханада тығылуға тырысқан, бірақ Бишімбаев есікті қағып, әрекетін жалғастырған. Бір кезде оның тамағынан ұстап алып, тұншықтыра бастаған, кейін Нүкенова есінен танып қалған. Осыдан кейін ол Нүкенованы VIP залдың еденіне жатқызып, өзі жанына ұйықтап қалған. Бейнебақылау камераларына түсірілген бұл оқиға экс-министрге қатысты сотта көрсетілді.

2023 жылы 9 қарашада таңертең Bau мейрамханасына жедел жәрдем шақырылған. Бұл кезде Салтанат Нүкенова қайтыс болған. Оның денесінен соққы іздері табылды.

Кейін полиция келіп, Қуандық Бишімбаев кісі өлтірді деген күдікпен ұсталды. Тергеу барысында ол туысынан бейнебақылау камераларындағы жазбаларды өшіріп тастауды сұрап, қылмыстың іздерін жасыруға тырысқаны анықталды.

Сот процесі

Салтанат Нүкенованың өліміне қатысты сот процесі 2024 жылы наурызда басталды. Бұл оқиға көпшіліктің назарын аударды.

Сот отырыстары тікелей эфирде көрсетілді, бұл - Қазақстан үшін бұрын-сонды болмаған жағдай. Сот барысында Салтанат Нүкенова соққыға жығылған сәттер бейнеленген бейнежазбалар ұсынылды.

Медициналық сараптамада өлім ми жарақатының салдарынан болғаны анықталды. Қуандық Бишімбаев жұбайын күшті дәрі-дәрмектер мен ішімдік ішіп, өзі құлап, жарақат алды деп, өз кінәсін мойындамады.

Алайда ұсынылған дәлелдер мен айғақтар нәтижесінде сот пен алқабилер Бишімбаевты кінәлі деп тапты.

Сот шешімі

2024 жылы 13 мамырда бұрынғы ұлттық экономика министрі Қуандық Бишімбаев асқан қатыгездікпен кісі өлтіргені және азаптағаны үшін 24 жылға бас бостандығынан айырылды.

Оның туысы Бақытжан Байжанов қылмысты жасырғаны үшін 4 жылға бас бостандығынан айырылды.

Instagram парақшамызға жазылып, ең қызықты ақпараттарды бірінші болып оқыңыз!