240 мың теңге үшін талас: 3577 үміткер докторантураға құжат тапсырған

Ұлттық тестілеу орталығының мәліметінше, биыл Қазақстанда 3 577 үміткер докторантураға құжат тапсырған, - деп хабарлайды Massaget.kz тілшісі inform.kz-ке сілтеме жасап. 

11 шілде мен 3 тамыз аралығында докторантураға түсу емтиханына 3 577 үміткер өтініш тапсырған. Биылдан бастап докторантура оқитындардың шәкіртақысы 240 мың теңге болып белгіленген болатын. 

Түсу емтиханының уақыты туралы ақпарат талапкердің testcenter.kz сайтындағы жеке кабинетінде "Менің іс-әрекетім" бөлімінде жарияланды.  

Емтиханға қатысу құны — 21 072 теңге.

TOEFL ITP сертификаты бар тұлғалар емтихан басталғанға дейін ағылшын тілін білуге арналған қосымша тестілеу тапсырады.

Қосымша тестілеуді өткізу орны мен уақыты туралы ақпарат 5 тамызда талапкердің жеке кабинетінде қолжетімді болады. Қосымша тестілеуге қатысу құны — 14 162 теңге.

Түсушілер міндетті түрде ҚАЗТЕСТ сертификатын және шет тілін меңгергенін растайтын сертификат ұсынуы керек.

2024 жылы шет тілін меңгергенін растайтын сертификаттардың шекті деңгейі B1-ге дейін төмендетілді және тізімге TOEIC және Duolingo English Test сертификаттары енгізілді.

Докторантураға "магистр" дәрежесі және кемінде 9 ай еңбек өтілі бар немесе медицина мамандықтары бойынша резидентурада оқу бітірген адамдар қабылданады.

Мемлекеттік білім беру тапсырысы бойынша және ақылы негізде докторантураға түсу үшін шекті балл — 75 балл. 

Аптаның басты оқиғалары мен пайдалы видеоларды көру үшін YouTube арнамызға жазылыңыз