2025 жылғы 9 қарашада Samarkand Marathon аясында TAN брендімен өткізілетін түркілік жүгірістер сериясының бірінші маусымының қорытындысы шығарылды. Бір жыл ішінде сериядағы барлық бес жарысты аяқтаған 22 спортшыға медаль табысталып, олар өңірлік спорттық туризм тарихында есте қалды. Серияға қатысу үшін спортшылар жүгірістерді өз қарқынымен өтуге мүмкіндік алады – әзірге уақыт бойынша шектеулер жоқ. 2025 жылы TAN жүгірістеріне барлығы 62 000 адам қатысты.
2025 жылы 30 қаңтарда Әзірбайжан, Қырғызстан, Қазақстан және Өзбекстандағы жүгірістердің ұйымдастырушылары Turkic Alliance of Long Runs (TAN) сериясында бірікті. Бұл түркі әлеміне спорттық саяхат жасау бастамасы.
TAN, Abbott World Marathon Majors және SuperHalfs сияқты әлемдік серияларға ұқсас құрылып, түркі елдерінде өткізілетін марафондарды біріктіріп, қатысушыларды олардың мәдени мұрасымен таныстырады. Қазіргі таңда серияға бес марафон кіреді: Baku Marathon, Bishkek Snow Leopard Run, Almaty Marathon, Turkistan Marathon және Samarkand Marathon.
Биылғы 9 қарашадағы соңғы жүгірісте 22 марафоншы TAN сериясының барлық жарыстарын аяқтаған алғашқы мәрешілер ретінде медаль алды. Олардың ішінде 12 қазақстандық, 6 өзбекстандық, 3 ресейлік және 1 қырғызстандық бар.
"Бірінші болу – батылдық" корпоративтік қорының қамқоршылық кеңесінің төрағасы, TAN Almaty Marathon және Turkistan Marathon екі жарысының ұйымдастырушысы Ғалымжан Есенов альянстың миссиясын былай түсіндірді:
"Біз басқа жарыс ұйымдастырушыларымен бірге өңіріміздің танымалдығын арттырып, салауатты өмір салтын насихаттау мақсатында түркі халықтарының халықаралық марафондар сериясы – TAN альянсын құрдық. Бұл ынтымақтастық спорттық туризмнің дамуына, елдер арасындағы байланыстардың нығаюына және ортақ мәдениетіміздің байлығын бүкіл әлемге көрсетуге мүмкіндік береді. Көз алдыңызға елестетіңізші: әлемнің түкпір-түкпірінен келген спортшылар біздің елдерге келіп, марафондарға қатысады, мәдениетімізбен танысады, ұлттық тағамдарымыздан дәм татады. Бұл – жай ғана спорттық шара емес, бұл түркі халықтарының достығы мен бірлігінің шынайы мерекесі. Бүгінде альянсқа Қазақстан, Өзбекстан, Әзірбайжан және Қырғызстан кіреді, ал алда – одан да үлкен мақсаттар күтіп тұр."
Nomad Sport компаниясының бас директоры, Bishkek Snow Leopard Run марафонының негізін қалаушылардың бірі Арслан Малдыбаев өзара тиімді серіктестікті атап өтті:
"TAN альянсы – бұл түркі халықтарын біріктіріп қана қоймай, туризмнің жаңа көкжиектерін ашып, әлем назарын біздің елдерге аударатын ауқымды қозғалыстың бастамасы екені сөзсіз. Бұл өз кезегінде туризм саласы мен спорттық туризмнің мүлде жаңа деңгейде дамуына берік негіз қалайды. TAN альянсына мүше ең шағын мемлекет ретінде Қырғызстан үшін бұл – стратегиялық маңызы зор оқиға. Біз бұл бастамадан үлкен үміт және айтарлықтай жоспарлардың жемісін күтеміз!"
Samarkand Marathon жүгірістер сериясының кураторы Мирхан Сагитов TAN альянсын тәжірибе алмасуға арналған маңызды алаң ретінде атап өтті:
"Samarkand Marathon-ның түркі елдерінің TAN марафондар альянсына қосылуы халықаралық ынтымақтастықты дамытудағы маңызды қадам болды. Бір жыл ішінде біз әріптестерімізбен тәжірибе алмасып, бірлескен бастамаларға қатысып, өңірдегі жетекші жүгіру іс-шараларының ұйымдастырушылары арасындағы байланысты нығайттық. Бұл біз үшін жай ғана серіктестік емес, жаңа идеялар мен жобалар туындайтын, түркі әлемінің жүгіру қауымдастығын біріктіретін маңызды платформа".
Суреттер: "Бірінші болу - батылдық" корпоративтік қорынан
Сарапшылардың болжамынша, TAN сияқты жобаларға қатысу әр марафонға халықаралық қызығушылықты арттырады. Биыл қазақстандық Almaty Marathon мен Turkistan Marathon шетелдік қатысушылар саны бойынша жаңа рекорд орнатты. Almaty Marathon-ға қатысқан 16 мың адамның ішінде шамамен 1 400 адам 60 елден келсе, Түркістан марафонына 365 шетелдік қатысушы қатысты. Қырғызстанда 32 елден келген 5 000 адам сөреге шықты – бұл да рекордтық көрсеткіш. Ал Өзбекстанда марафоншылар саны бір жыл ішінде дерлік үш есеге (198,5%) артқан.
Серияға қатысу үшін спортшылар марафондарды өз қарқынымен өте алады – әзірге уақыт бойынша шектеулер жоқ. Тіркелу tanseries.com сайтында ашық.
Серіктестік материал
Massaget.kz