Биыл қосымша 4 мың шақырым ақылы учаскені іске қосу жоспарланып отыр. Бұл бюджет кірісін 60 млрд теңгеге дейін ұлғайтуға мүмкіндік береді, - деп хабарлайды Massaget.kz тілшісі.
Үкімет отырысында көлік министрі Марат Қарабаев ақылы жолдардан түсетін табыстың айтарлықтай өскені туралы баяндады. 2024 жылы түсім сомасы 48 млрд теңгеге жетті.
"Бұл ретте, осы ақылы жолдардан түскен қаражаттың бір бөлігін құрылыс жұмыстарына алынған қарыздардың пайыздық мөлшерлемелерді өтеуге жұмсау мәселесі қарастырылып отыр", - деп атап өтті министр.
Министрдің сөзінше, бюджетке түсетін жүктемені азайту әрі өзін-өзі ақтау мақсатында реконструкциялау және жөндеу жұмыстары аяқталған учаскелерде "ақылы жол" мәртебесін кезең-кезеңімен енгізу жалғасып жатыр. Қазіргі уақытта бүкіл еліміз бойынша ұзындығы 3,2 мың шақырым ақылы жол жүйесі жұмыс істейді.
"2029 жылға дейін 60 бірлік кешенді объектілердің құрылысы жоспарланған, оның ішінде 10 бірлігі осы жылы жүзеге асырылады. Инвестиция көлемі 120 млрд теңге. Оларда жатын орын, TIR тұрағы және жанармай бекеттері қарастырылған. Жол бойы сервистік объектілерін дамытудың негізінде елімізде бірінші рет отандық қонақүйлер жүйесі және олардың франшизасы қалыптасатын болады. Бұл жол бойы объектілерінің тасымал процесімен қатар, автотуризмнің де дамуына септігін тигізеді", - деп атап өтті Марат Қарабаев.
Айта кетейік, бүгінде елімізде 1 446 жол бойы сервистік объектілері жұмыс істейді. Сондай-ақ үкімет отырысында Бектенов әкімдерге жол салуға арналған жер телімдерінің нысаналы мақсатын өзгертуге мораторий жариялауды тапсырды.
Қызықты жаңалықтар мен видеоларды көру үшін TikTok арнамызға жазылыңыз!
А. Бақдаулет