2017 жылдан бастап Астанадағы теміржол вокзалының автотұрақ аймағы әкімдік қарауына өтеді

2017 жылдың басынан бастап теміржол вокзалының автотұрақ аймағы ҚТЖ-дан елорда әкімдігінің қарауына өтеді. Осыған байланысты және елорда тұрғындары мен қонақтарынан шағымдардың көптеп түсуіне байланысты Астана әкімі теміржол вокзалында көшпелі кеңес өткізді. Сейсенбі күні кешке Әсет Исекешев вокзалға өзі барып, халықтың шағымдары жедел шешім қабылдауды талап ететініне көзі жетті, - деп хабарлады Астана қаласы әкімінің баспасөз қызметі.

Осыған байланысты әкім қоғамдық көліктің жұмысы үшін жауапты бірінші орынбасары Сергей Хорошунға 10 қаңтарға дейінгі мерзім ішінде вокзал маңындағы алаңды тәртіпке келтіруді тапсырды.

Әкім 2017 жылдың ақпан айында теміржол вокзалында халық шағымдарын ескере отырып, ғимарат ішінде қайта құрылыс жұмыстары басталатынын жеткізді. Жұмсақ орындықтар қойылып, балаларға арналған аймақтар бөлінеді, супермаркет, сату кассалары талапқа сай жетілдіріледі, ғимараттағы қауіпсіздік күшейтіледі. Жұмыстар келесі жылдың 1 сәуіріне дейін жүргізілуге тиіс.

10 қаңтардан бастап вокзал маңы алаңында ақылы паркинг іске қосылады, ол автокөліктерді тәртіпсіз қою мәселесінен арылтады. Паркингті оқу курстарынан өтіп, салық органдарында тіркелген аккредитацияланған такси көліктері ғана пайдаланатын болады. Әсет Исекешевтің айтуынша, осының бәрі жолаушылардың қауіпсіздігі мен ыңғайлылығын қамтамасыз етуге бағытталған.

«Келесі жылғы қаңтардың ортасынан бастап елорда вокзалы маңындағы алаң «сағат сияқты» жұмыс істейді. Сергей Хорошунға Көліктік бақылау комитетінің, мемлекеттік кірістер комитетінің, елордалық ІІД Жергілікті полиция қызметінің өкілдерінен жұмыс тобын құрып, аумақта тәртіп орнатуды тапсырамын», -  деді Әсет Исекешев.

Әкімнің айтуынша, күн сайын вокзал 40 мыңға дейін адамды қабылдайды (жолаушылар мен шығарып салушы адамдарды есептегенде) және жаңа теміржол вокзалы қолданысқа енгізілгеніне қарамастан, ескі вокзал барлық, соның ішінде, жайлылық бойынша да халықаралық стандарттарға сәйкес келуге тиіс.