20 фашистің көзін құртқан мерген Мария Шинкевич пен бүгінгінің снайпер аруы Толқын Бәкіжанова кездесті

Қарағанды қаласының  тұрғыны, 19 жасында майдан көрген Мария Шинкевич бүгінде 98 жаста. Соғыста мергендігімен көзге түскен ол 20 жаудың көзін құртқан. Қанды жолды барлаушылармен алдынғы шепте жүріп өткен. Чехословакияны азат етіп, жеңісті Прагада қарсы алған.

“Снайпер - батыл әрі өз-өзіне сенімді болуы керек. Соғыс деген бәрібір де қорқынышты. Оны бүгінгі ұрпақтың басына салмасын. Елімізде бейбітшілік болсын”, - дейді, соғыс ардагері Мария Шинкевич.

Соғыс ардагерімен "Астана" өңірлік қолбас­шы­лығының әскери бөлі­мінің мергені Толқын Бәкіжанова кездесіп, мерекемен құттықтады. Осылайша ұрпақтар сабақтастығымен, қос мерген арудың кездесуі орын алды.

Толқын Бәкіжанова "Бейбітшілік жауынгері-2021" кә­сіби шеберлік сайысында Ресей, Армения, Беларусь, Грекия және Қа­тар елдерінен келген өзі секілді әріп­тестерінен озып, жеті медаль мен же­ңімпаз кубогын алған.

“Жас ұрпақ тарихты ешқашан ұмытпауы керек. Бұл кісілердің арқасында біз бүгін бейбіт өмір сүріп жүрміз. Соғыс ардагерлеріне, еліміздің батырларына өмір бойы қарыздармыз. Бұл жандарды тек мерекеде еске алмай, әрдайым алғысымызды айта жүруіміз керек”, - дейді мерген Толқын Бәкіжанова.