"2 жасар баласы әкесін жұмысқа жібергісі келмеген суреті қалыпты". Зәкиева шахтадағы апат туралы
!["2 жасар баласы әкесін жұмысқа жібергісі келмеген суреті қалыпты". Зәкиева шахтадағы апат туралы](/userdata/news/news_93433/image_l.jpg)
Бала құқықтары жөніндегі уәкіл Динара Зәкиева қаза тапқан 9 кеншінің артында кәмелетке толмаған балалары қалғанын айтты, - деп хабарлайды Massaget.kz тілшісі.
"Бүгін Насымжан Жамбекқызы, ҚР ОАМ БҚҚК бірге қаза тапқан кеншілердің балаларына бардық. 9 кеншінің артында кәмелетке толмаған балалары қалған. Отбасылардың қазір басынан өтіп жатқан қиындықты сөзбен жеткізу мүмкін емес. Бір кеншінің 2 жасар баласы әкесін жұмысқа жібергісі келмей, аяғынан ұстап тұрған суреті қалыпты. Тағы бір кеншінің анасы ұлының жұмысқа кетерінде мәңгіге кетіп бара жатқандай қоштасқанын есіне алып жатыр", - деп жазды ол әлеуметтік желіде.
Динара Зәкиева балаларға психологиялық көмек ұйымдастырылып жатқанын, мемлекеттік органдар мен әкімдік Президент тапсырмасымен отбасыларды жан-жақты көмекпен қамтамасыз ету бойынша жұмыс істеп жатқанын айтты.
Еске салайық, Қарағанды облысындағы Костенко атындағы шахтада жарылыс болды. Қаза тапқандар саны 42 адамға жетті.
Мемлекет басшысы Қасым-Жомарт Тоқаев Қарағанды облысындағы кеншілердің қазасына байланысты көңіл айтып, "АрселорМиттал Теміртау" компаниясымен ынтымақтастықты тоқтатуды тапсырды.
Кейін үкімет "АрселорМиттал Теміртауды" Қазақстанның пайдасына беру бойынша мәміленің аяқталғанын хабарлады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова