19 жастағы алматылықтың мемлекет алдындағы қарызы 7 миллион теңге болып кеткен

Алматыда 7 миллион теңге айыппұлы бар көлік жүргізушісі ұсталды, - деп хабарлайды Massaget.kz тілшісі.

Алматының 19 жастағы тұрғыны жол ережесін өрескел бұзған болып шықты. Оны полицейлер қаланың Медеу ауданындағы Достық даңғылы бойында ұстады.

"Бұл жолы да "Қорғау - қауіпті жүргізуші" автоматтандырылған жүйесі тиімді пайдаланылды. Аз уақыт ішінде көлік жүргізушісі 195 рет жол ережесін бұзған. Айыппұлдың жалпы сомасы шамамен 7 миллион теңге болған. Оның үстіне кей жағдайда, өкінішке қарай, жүргізуші жалған нөмірді пайдаланып, көліктің жылдамдығын 200 шақырымға дейін үдеткен. Көліктің өзі көрші Қырғызстанда тіркелген.

Сот қаулысымен көлік жүргізушісі әкімшілік қамаққа алынды, оның көлігі мамандандырылған айыппұл тұрағына қойылды. Жүргізуші барлық айыппұлдарын толығымен төлеуге міндетті болады", - деді Алматы қалалық полиция департаменті бастығының орынбасары Нұрлан Аманбек.

Алматы полициясы жазаның бұлтартпастығы қағидасын тағы да еске салып, жол қозғалысына қатысушыларды жол қозғалысы ережелерін қатаң сақтауға шақырды.

Қызықты жаңалықтар мен видеоларды көру үшін TikTok арнамызға жазылыңыз!