"18 жасымда инсульт алдым". 48 жасында жүгіруді қолға алған желаяқтың хикаясы

Танымал жазушы Харук Мураками "О чем я говорю, когда говорю о беге" деген кітабында жүгірудің құдіреті туралы айтады. Әрине, жүгіру денсаулық пен форманы қалыпта ұстаудан бөлек, әлемнен бір сәт оқшаулануға, өзіңмен өзің қалуға мүмкіндік береді. Қай жаста болсаңыз да, бұл спорт түрін қолға алудың ерте-кеші жоқ, шын ниетпен қаласаңыз болғаны. Massaget.kz тілшісі 48 жасында жүгіруді қолға алған кейіпкермен сұхбаттасты. 

Дәурен Құдайберген 48 жаста. Ол бұл спорт түрін былтыр күзде қолға алған. 

"Былтыр жұмыс бабымен Астанаға көштім. Сол кезде әріптес-досым, бауырым кәсіпкер, журналист Мақсат Ясылбайұлы "уақытты босқа өткізбеңіз, жүгірейік" деген еді. Мақсат осыдан 2-3 жыл бұрын атақты рекордсмен Марат Жыланбаевтың курсына қатысып, жүгірудің қыр-сырын меңгерген. Жүгіргенде қандай мәселелерді ескеру керегін игеріп алған. 

Қыркүйекте, 1 ай бойы жай ғана жүрдім. Күніне 5-10 шақырым жүріп өтетінмін. Жүргенде де аяқты дұрыс қою керек. Көп адам, оның ішінде мен де дұрыс жүрмей жүрдім. 60-70 пайыз адам аяқты сыртқа басады, аяқ саусақтары параллель тік басылу керек. Бұл адамның дене бітіміне де әсер етеді. Бастапқы кезде денем де, аяғым да ауырып жүрді. Қазанда ақырындап жүгіре бастадым. Алдымен 200 метр жүгіріп, сосын 200 метр жүріп жүрдім. Күніне 10 шақырымға дейін жеткізетінмін. Содан желтоқсанның ортасында Астананың суығында тоқтамай 11 шақырым жүгіріп өттім. Қасымда жүрген досым "табандылық, тұрақтылық кез келген адамды мақсатына жеткізеді" деп мен туралы жазба жазған екен. 48-ге келген адам тура 30 жыл өткеннен кейін жүгіруді қайта бастады", - дейді кейіпкер. 

Дәурен Құдайберген мектепте оқығанда жүгіргенін еске алды. Оның айтуынша, оқушы кезде жүгіруден түрлі жарыстарға қатысып, жүлделі орын алып жүрген. Алайда жүгірудің техникасын жетік білмеген. 

"18 жасымда инсульт алып, ауырып қалдым. Ол кезде ҚазҰУ-дің 1-курс студентімін. Майда тамырым үзіліп кетіп, қан миға кетуге шақ қалды. Кейін үйлендім де жүгіруді қойдым. Спортшылар арасында "бұлшықет жады" деген ұғым бар. Араға 30 жыл салып, бұл спорт түрін қайта қолға алдым. Менің ойымша, табандылықтың арқасында бұрынғы форманы қалыпқа қайта келтіруге болады", - деді ол. 

Дәурен Құдайбергеннің сөзінше, ол аптасына үш күн жүгіреді. Ол бұл спорт түрін қолға алғаннан бастап бірде бір рет жаттығуды жібермеген. Таңғы 5:00-де тұрып, жаттығу алаңына барады. Денсаулығында да, дене бітімінде де айтарлықтай өзгеріс байқалғанын айтады. 

"Аптасына 3 күн таңғы 5-те тұрып жүгіру ширақ әрі зергек болуға жетелейтіні анық. Одан басқа, денеңіз қатайып, өнімді жұмыс істеуге, тез ойланып, тез шешім қабылдауға, өзіңе сенімді болуға әсер етеді. Оның үстіне, жарық ауруына шалдыққаннан бері таңертең тұрып, жаттығу істеймін. Осының арқасында жүгіргенде аса қиналған жоқпын", - дейді кейіпкер. 

Дәурен Құдайберген қақаған аязда да жүгіре беретінін айтты. 

"Мамандар -20 градус аязда жүгіруге кеңес бермейді. Ал біз -26 градус аяз болғанда да жүгіріп жүрдік. Кросс жүгіретіндердің айтуынша, күн қанша суық болса да қалың киінбеу керек. Оның орнына бірнеше жұқа кім кию керек. Жүгіретіндердің суық күнде киетін бетперде, қолғабы, кроссовкиі болады", - деді ол. 

Кейіпкер жүгіруге пайдалы кеңестерді бөлісті. Оның айтуынша, спортпен шұғылдануға ештеңе кедергі келтірмейді. 

"Жүгіруді бастау ешқашан кеш емес, оның зияны жоқ. Бір ескеретін мәселе, жүгіріп жүргенде ішетін тағамды да ретке келтіру керек. Сұйық тағам, витамин ішу керек. Буындарға әсер ететін, иммунитет көтеретін витамин ішу керек. Тағы бір байқағаным, тер адам бойындағы ауру-сырқауды шығарып отырады. Сондықтан жүгіруден қорықпаңыз", - дейді кейіпкер. 

Қыста жүгірудің пайдасы неде?

Instagram парақшамызға жазылып, ең қызықты ақпараттарды бірінші болып оқыңыз! күн