18 жастағы цирк әртісінің жұмбақ өлімі: қылмыстық іс тоқтатылған
![18 жастағы цирк әртісінің жұмбақ өлімі: қылмыстық іс тоқтатылған](/userdata/news/news_94483/image_l.jpg)
Сәтбаев қаласына гастрольдік сапары кезінде өлі табылған 18 жастағы цирк әртісі Мария Кацунның өліміне қатысты қылмыстық іс тоқтатылды, - деп хабарлайды Massaget.kz тілшісі.
Бұл туралы Ұлытау облысы Полиция департаментінің баспасөз қызметі хабарлады. Ведомство мәліметінше, Қылмыстық кодекстің 105-бабы 1-бөлігі "суицидке жеткізу" бойынша жүргізілген тергеудің анық-қанығы белгілі болған.
"Қылмыстық іс бойынша ешкім күдікті деп танылған жоқ. Дәлелдер расталмады. Мұны өлімнен кейінгі психиатриялық сараптама қорытындысы дәлелдейді. Тергеу нәтижелері бойынша 30 қыркүйекте қылмыс құрамы болмауына байланысты істі тоқтату туралы шешім қабылданды, қабылданған шешімді Сәтбаев қаласының прокуроры бекітті", - делінген Ұлытау облыстық Полиция департаментінің Tengrinews.kz-ке жауабында.
Сондай-ақ, полиция Мария Кацунның өліміне механикалық асфиксия себеп болғанын мәлімдеді.
Айта кетейік, былтыр қарашада 18 жастағы Мария Кацун Сәтбаевтағы цирк вагонында асылып тұрған күйде табылды. Өлер алдында ол Ұлытау облысына гастрольдік сапармен барған. Мария Алматыдағы Елебеков атындағы республикалық эстрада-цирк колледжінде оқыған.
Әртістің жұмбақ өлімі резонанс тудырды. Оның жақын достары суицид дегенге сенбеді. Мария Кацунның ата-анасы жоқ. Ал әжесі қайтыс болғаннан кейін ол балалар үйінде тәрбиеленген.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова