Әлеуметтік желілерде 17 қарашада жаһандық кибершабуыл болып, интернет үш айға өшеді, ал банк шоттарындағы ақша жоғалады деген ақпарат таралып жатыр. Жалған ақпаратқа қарсы іс-қимыл орталығы бұл хабарламаларды негізсіз деп атап, олардың таралу жолын түсіндірді, деп хабарлайды Massaget.kz.
17 қарашада интернет пен банк жүйелері жаппай істен шығады деген мәлімдемелер ресми деректермен расталмаған.
Қауесет қайдан шыққан?
Орталықтың мәліметінше, қауесет X желісіндегі Wesley есімді қолданушының жазбасынан тараған. Ол "даркнеттегі анонимді дереккөзге" сүйенген. Кейін бұл хабарламаға түрлі елдердегі азық-түлік қорын сақтау жөніндегі кеңестер қосылып, бір-біріне қатысы жоқ ақпараттар бір оқиға ретінде көрсетілген.
Үш негізгі мәлімдеме: не белгілі?
"Интернет үш айға өшеді"
17 қарашада интернет пен байланыс қызметтерінің бүкіл әлемде тоқтайтынын растайтын ресми дәлел жоқ. Қазақстандағы Кибершабуылдарды талдау және тергеу орталығы да бұл ақпараттың ресми дереккөздерде расталмағанын мәлімдеді.
"Банк шоттарындағы ақша жоғалады"
Жалған ақпаратқа қарсы іс-қимыл орталығының мәліметінше, дәл осы күні банк шоттарындағы қаражат жаппай жойылады деген болжамға нақты дәлел келтірілмеген. Қауесет авторларының анонимді дереккөзге сілтеме жасауы ақпараттың растығын дәлелдемейді.
"Шұғыл түрде азық-түлік пен су жинау керек"
Үйде 72 сағатқа жететін қажетті заттарды сақтау — төтенше жағдайларға алдын ала дайындық жөніндегі жалпы кеңес. ТЖМ түсіндірмесіне сәйкес, бұл ұсыным нақты бір күнге немесе 17 қарашадағы болжамды кибершабуылға байланысты емес.
Қазақстандағы мекемелер не деді?
Tengrinews.kz тілшісінің хабарлауынша, Үкіметтегі брифингте төтенше жағдайлар министрі Мұрат Мұханов 17 қараша туралы хабарламаларға қатысты пікір білдірді. Журналистердің қазақстандықтарға алаңдауға негіз бар ма деген сұрағына министр былай жауап берді:
"Бүгінгі таңда азаматтарымызға алаңдаудың еш қажеті жоқ екенін сеніммен айта аламын. Үкімет, соның ішінде ТЖМ мұндай хабарламаларды таратқан жоқ", – деді Мұрат Мұханов.
Азық-түлік қорын жинау керек пе деген нақтылау сұрағына министр әркім бұл шешімді өзі қабылдайтынын айтты.
"Әркім өзі шешеді. Бірақ біз мұндай хабарламаларды таратқан жоқпыз", – деп қосты министр.
Бұған дейін Төтенше жағдайлар министрлігі интернеттің өшуі немесе азық-түлік пен су қорын шұғыл жинау қажеттігі туралы ресми ескерту таратпағанын мәлімдеген. "Қазақтелеком" желісі қалыпты режимде жұмыс істеп тұрғанын және 17 қарашада ауқымды іркіліс болады деген расталған ақпарат жоқ екенін хабарлады.
Қауесетті алаяқтар пайдалануы мүмкін
Мұндай үрейлі хабарламалар "ақшаңызды кибершабуылдан қорғаймыз" деп сендіруге тырысатын алаяқтарға қолайлы жағдай туғызуы мүмкін. Сондықтан банкке немесе шоттағы қаражатқа қатысты күмәнді хабарламаны банктің ресми арналары арқылы нақтылаған жөн.
Кез келген хабарламаны бөліспес бұрын, оның авторын, келтірілген дәлелін және жауапты мекемелердің ресми түсіндірмесін тексеріңіз. "Сақтық үшін" жасалған репосттың өзі жалған ақпараттың таралуын күшейтеді.