1,3 миллион теңге: Қайтарымсыз грант алуға өтініш қабылдау басталды

Бүгін бизнес-идеяларды іске асыру үшін мемлекеттік гранттар алуға өтінім қабылдау басталады, - деп хабарлайды Qazaqstantv. 

20 ақпанда business.enbek.kz порталында жаңа бизнес-идеяларды іске асыру үшін мемлекеттік гранттар алуға өтінім қабылдау басталады.

Мемлекеттік грант сомасы - 1 миллион 380 мың теңге. Әр қатысушы оны тек бір рет ала алады.

Ел бойынша бірінші ағында 2577 грант беру жоспарланып отыр.

Қайтарымсыз қаржы алуға кімдер үміткер бола алады?

• тіркелген жұмыссыздар; 
• жеке кәсіпкерлер (тіркеу мерзімі 3 жылға дейін).

Бұл ретте үміткер төмендегі әлеуметтік санаттардың бірінен болуы керек:

• Мүгедектігі бар адамдар;
• Қандас мәртебесін алғандар;
• Қоныс аударушылар және олардың еңбекке қабілетті отбасы мүшелері;
• Аз қамтылған отбасылардың мүшелері;
• Көпбалалы отбасының мүшесі (жұбайы, зайыбы);
• Мүгедектігі бар баланы тәрбиелеп отырғандар (жұбайы, зайыбы);
• Асыраушысынан айырылу бойынша жәрдемақы алатындар.

Үміткердің "Бастау Бизнес" жобасы бойынша кәсіпкерлік негіздеріне оқыту туралы сертификаты болуға тиіс.

Қайтарымсыз грант алуға өтініш беру үшін:

• Business.enbek.kz порталында тіркелу керек;
• Грант алу шарттарының сәйкестігіне тексеруден өту қажет;
• Бизнес-жоспар үлгісін жүктеп алып, оны толтырып, порталға енгізу керек;
• Өтініш нысанын толтырып және ЭЦҚ кілтімен қол қою қажет.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!