Қаржылық мониторинг агенттігі "Бірыңғай жинақтаушы зейнетақы қоры" АҚ-дан азаматтардың жинағын заңсыз алу деректері бойынша стоматологиялық клиникалардың басшылары мен өзге де адамдарға қатысты тергеп-тексеру жүргізіп жатыр, - деп хабарлайды Massaget.kz тілшісі.
Қанша адам қамауда?
ҚМА мәліметінше, зейнетақы жинағы стоматологиялық қызмет көрсету туралы шарттар жасасу және кейін жалған медициналық құжаттар ұсыну арқылы алынған.
"Бұл көмек үшін күдіктілер қаражаттың 10%-дан 20%-ға дейінгі мөлшерінде заңсыз сыйақы ұстап отырған. Қылмыстық схемаға 42 стоматологиялық клиника тартылған. Жалпы сомасы 200 млрд теңгеден аса қаражат алынған. Қылмыстық жолмен келген табысқа күдіктілер элиталық жылжымалы және жылжымайтын мүлік сатып алып, оны жасыру мақсатында үшінші тұлғалардың атына рәсімдеп, жаңа стоматологиялық клиникалар ашқан. Он бір күдікті 2 ай мерзімге қамауға алынды, ал үшеуіне қатысты үйқамақ түріндегі бұлтартпау шарасы таңдалды", - деп жазылған хабарламада.
Жалпы қаражат сомасы
Агенттік мәліметінше, жүйелі түрде заңсыз сыйақы алу үшін медициналық мекемелердің дәрігерлері де дәрігерлік-консультациялық комиссиялардың (ДКК) жалған қорытындыларын берген. Күдіктілерден алынған қаражаттың жалпы сомасы - 30 млн теңге.
Бұл деректер бойынша соталды тергеп-тексерулер басталған.
Өзінің зейнетақы жинағын алғандарға не болмақ?
Агенттік өзінің зейнетақы жинағын алған азаматтар қылмыстық жолмен қудаланбайтынын мәлімдеді.
Еске салайық, бұған дейін "Отбасы банк" тіс емдеуге өтініш беру кезінде БЗЖҚ қаражатын мақсатсыз пайдалану және құжаттарды қолдан жасау деректері анықталғанын мәлімдеді.
Кейінірек Бірыңғай жинақтаушы зейнетақы қорынан қаражатты заңсыз алуға жәрдем көрсеткен 5 қылмыстық топтың әрекеті әшкереленді.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова