"Жайлы мектеп" ұлттық жобасы аясында 1 қыркүйекте Целиноград ауданына қарасты Талапкер ауылында мектеп-гимназиясы мен IT-лицейі оқушыларға есіктерін айқара ашты. Жаңа оқу жылында 100-ден астам педагог 1800-ге жуық оқушыға сапалы білім бермек.
Білім ошақтары 3 қабатты. Кабинеттердің барлығы заманауи жабдықтармен жабдықталған. Сапалы білім беру үшін мұнда барлық жағдай жан-жақты жасалған.
Интерактивті тақталары бар пәндік кабинеттерден бөлек, шеберханалар мен зертханалар да бар. Балалардың қауіпсіздігін қамтамасыз ету мақсатында бейнебақылау камералары мен дабыл түймелері орнатылған.
Ақмола облысының әкімі Марат Ахметжанов мектеп-гимназияның оқушыларын Білім күнімен құттықтады.
"Елордаға іргелес жатқан Целиноград ауданында халықтың көші-қонына және демографиялық өсуге байланысты ұзақ уақыт бойы оқушы орындарының тапшылығы байқалды. Президент Қасым-Жомарт Тоқаев бастамашылық еткен "Жайлы мектеп" ұлттық жобасы мектептердегі орын тапшылығы мәселесін шешеді, оқушылар мен педагогтар үшін қолайлы жағдай жасайды және қала мен ауыл мектептері арасындағы білім беру сапасындағы алшақтықты азайтады. Өскелең ұрпақтың үйлесімді және бақытты балалық шағы - біздің жалпыұлттық міндетіміз. Сіздерге сәттілік пен жарқын жеңістер тілеймін!", - деді облыс әкімі.
Мектептердің салтанатты ашылу шарасына Денсаулық сақтау министрі Ақмарал Әлназарова мен Парламент Мәжілісінің депутаты Асхат Аймағамбетов те қатысып, жиналған жұртшылықты мерекемен құттықтады.
"Қазір білім беру саласына ерекше көңіл бөлінуде. Біздің ауылда жаңа мектептер салынып жатқанына куә болдық. Оқу бір ауысымда болады, ал түскі астан кейін балалар үйірмелер мен спорт секцияларына қатыса алады", - деді мектеп-гимназиясы ата-аналар комитетінің төрағасы Құттыбай Байғабылов.
Айта кетейік, жаңа оқу жылында өңірде 3 мектеп ел игілігіне берілді. Оның 2-еуі "Жайлы мектеп" ұлттық жобасы аясында салынды.
Сонымен қатар жыл соңына дейін тағы 11 білім беру мекемесі ашылады деп жоспарланып отыр. Оның 7-еуі "Жайлы мектеп" ұлттық жобасы аясында бой көтеруде.
Өңірде 528 мектеп бар. Онда 150 мыңнан астам оқушы білім алады. Оның ішінде 13 мыңға жуық бірінші сынып оқушылары.
Ақмола облысы әкімінің баспасөз қызметі ұсынған материал