Маңғыстау облысы Мұнайлы ауданы Басқұдық ауылының жеке балабақшасында болған оқиғадан кейін тәрбиеші мен бала күтуші жұмыстан шығарылды. Бұған қоса тәрбиеші әкімшілік жауапкершілікке тартылып, оған айыппұл салынды, - деп хабарлайды Massaget.kz тілшісі lada.kz-ке сілтеме жасап.
Оқиға қалай болған?
Оқиға Басқұдық ауылындағы жекеменшік балабақшалардың бірінде болған. Басылым мәліметінше, тәрбиеші 1 жас 6 айлық қыздың қолын қайырған, артынша медициналық көмек те көрсетпеген. Бұл туралы зардап шеккен қыздың анасы Венера Жансерікова мәлімдеген. Ал БАҚ-та тәрбиеші бір жасар қызды жұлқылап, қолын шығарып жібергені айтылды.
Қандай шара қолданылған?
Білім бөлімі өкілдері зардап шеккен қыздың ата-анасының өтініші бойынша "Жібек жолы" балабақшасындағы мән-жайды анықтау үшін оқиғаны зерделеу жөніндегі комиссия құрылғанын айтты.
"Комиссия балабақшада тексеріс жүргізді. Тәрбиеші мен бала күтуші жұмыстан шығарылды. Тәрбиеші ҚР ӘҚБтК-нің 127-бабы 1-бөлігіне сәйкес жауапкершілікке тартылып, оған 10 АЕК, яғни 39 320 теңге көлемінде айыппұл салынды", - деп мәлімдеді Білім басқармасының өкілі.
Қазір бала басқа балабақшаға баратыны белгілі болды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова