ФОТО: Академик Сәтпаевтың ері табылды

Сәтпаевтар отбасынан қалған жәдігерді мұражайға Павлодар қаласының тұрғыны ұсынды.

Tengrinews сайтының хабарлауынша, бұл бағалы мұраны Баянауыл ауданында орналасқан Сәтпаев атындағы мұражайға Павлодар облысындағы Теңдік селосының тұрғыны Тастемір Шәшенов әкеліп берген.

"Бұл өте ескі әрі бағалы жәдігер. Шамамен алғанда бұл ер осыдан екі ғасыр бұрын жасалып шыққан. Бұйым қайыңнан ойылып, күміспен күптелген, киізбен көмкерілген", - деп сөз сөйледі Сәтпаев атындағы мемориалдық мұражайдың директоры Үміт Сағымбекова жаңа экспонатты таныстыру кезінде.

Мұражай қызметкері жәдігерді таныстыру үстінде

Академик Қаныш Сәтпаевтың ері

"Тастемір Шәшеновтың айтуынша, оның әпкесі кезінде Қаныш Сәтпаевтың туысына тұрмысқа шыққан. Бұл отбасылық жәдігер бұған дейін ұрпақтан ұрпаққа мұра болып өтіп келе жатқан. Ақыры не керек, бұл ер Тастемір Шәшеновтың қолына түскен. Біздің ойымызша бұл ерді жас кезінде тек Қаныш аға емес, сонымен қатар, оның әкесі де пайдаланған", - дегенді де қоса айтты Сағымбекова.

Академик Қаныш Сәтпаевтың ері

Айта кетелік, Қаныш Сәтпаев атындағы мемориалдық мұражай ғалымның туған жерінде Паволдар облысының Баянауыл ауданында 1967 жылы ашылған. Қазіргі кезде орталықта 3190 экспонат сақтаулы тұр. Бұлардың ішінде академиктің фотосуреттері, құжаттары, ғылыми еңбектері секілді қызғылықты материалдар бар.

Мұражай директорының айтуынша, ғалымның балалық шағына байланысты жәдігерлер орталық қызметкерлерінің қолына бұған дейін түспеген. Осы себепті бұл ердің ерекше құнды екендігін айтып өтті басшы.

Дайындаған: Еркебұлан Қайрахан

сурет: Уикипедия, Tengrinews.kz