Қазақ тілінде ән айтып жүрген италиялық әнші Сон Паскаль өзінің тыңдармандарын кезекті жаңалығымен қуантып қана қоймай, бұл жолы тіпті таңғалдырмақ ниетте. Ол «Махаббат» атты жаңа әніне еліміздің бас қаласы – Астанада реалити-шоу жанрында жаңа бейнеклип түсірді.
Бұл бейнебаян арқылы Сон Паскаль сазгер-әнші ғана емес, оператор және режисер ретінде бағын сынап көрді. Бейнебаянды түсіру үшін әнші қолына камера алып, жаңа туындысы - «Махаббат» әнін айта жүріп, бір күнде Астана қаласын аралап шықты. Басты көшелерден бастау алып, Есілдің бойын жағалаған автор қалалық №4 мектеп, Л.Н.Гумилев атындағы Еуразия Ұлттық университеті, әуежай, «Хан шатыр», «Керуен» ойын-сауық орталықтары, тіпті спорттық жаттығу орындарына дейін барып, халықтың көңіл-күйін көтерді, астаналықтарды армансыз билетті. Осының бәрі бейнебаянда қаз-қалпында қамтылған. Астана жұрты осылайша махаббат туралы жаңа әннің алғашқы тыңдармандары болды.
«Махаббат» әнінің сөзін жас ақындар жазса, сазын әншінің өзі шығарған. Ғашықтық сезім, сүйіспеншілік – бейнебаянның негізгі тақырыбы. Ал басты ерекшелігі – мұнда еш жасандылық жоқ.
Бейнебаян режисері – Санжар Мәдиев.
Жолдаған: Гүлназ Сатыбалдықызы
Сурет: Гүлназ Сатыбалдықызы
Дайындаған: Мейіргүл Оңғарова