Джордж Майклмен орындалған ұмытылмас дуэттер

Джордж Майкл — атақты британиялық әнші, ақын әрі композитор. Дара жолында және Wham! дуэтімен өткерген музыкалық мансабында 100 миллионнан астам альбомы сатылып, ең танымал поп-жұлдыздар қатарына енді.

«I Knew You Were Waiting (For Me)» – Арета Франклинмен

Бұл ән Wham! дуэті тарағаннан кейін бір жылдан соң, яғни, 1987 жылы танымал болды. Әнді Арета Франклинмен бірлесе орындау арқылы Джордж, біріншіден, сүйікті орындаушысымен бір сахнада тұру мүмкіндігіне ие болса, екіншіден, Wham! дуэтіндегі мансабынан кейін, өнерге жеке әнші ретінде қайта аяқ басқанын көрсетті. Нәтижесінде «I Knew You Were Waiting (For Me)»  UK Singles Chart аталатын британиялық чартта ғана емес,  Billboard хит-шеруінде де топ-100 тізімінде бірінші орыннан көрінді. «Үздік R&B-дуэт» номинациясы бойынша ең беделді сыйақы саналатын «Грэмми» сыйлығын иеленді.

«Don’t Let The Sun Go Down On Me» – Элтон Джонмен

Элтон Джон «Don’t Let The Sun Go Down On Me» әнін 1974 жылы жазды. Оны алғаш рет 1985 жылы Live Aid фестивалінде Джордж Майклмен бірге орындап шықты. Ал, 1991 жылы Уэмбли стадионында өткен Джордж Майклдың шоуында әнді тағы бір мәрте бірге орындаған еді. Аталмыш туындының жанды дауыста орындалған нұсқасы британиялық және америкалық чарттардың алғашқы орындарынан бой көрсетті.

«Somebody To Love» – Queen тобымен

Джордж Майкл Queen тобының өнеріне табынушылардың бірі еді. Ол жасөспірім кезінде Queen тобының әндерін лондондық жертөрелерде орындаған, кейін есейген шағында аңыз-тұлға Фредди Меркьюримен достық қатынаста болды. Фредди Меркьюри соңғы сұхбаттарының бірінде Джордждың музыкасын ұнататынын, әсіресе, «Faith» әнін сүйсіне тыңдайтынын айтқан. 1992 жылы Фредди өмірден өткеннен бір жылдан кейін Уэмбли стадионында оны еске алу кеші өтті. Сол кеште Джордж Майкл Queen тобының музыканттарымен бірге «Somebody To Love», «39», «These Are the Days of Our Lives» сынды хит әндерді орындады. Солардың ішінде «Somebody To Love» композициясы «сол кеште үздік орындалған ән» атанды. Ән «Five Live» синглына енді, ал шоудан кейін Майкл Queen тобында Меркьюридің орнына өнер көрсететін болады деген алып-қашпа сөздер де жүрген-ді.  

«If I Told You That» – Уитни Хьюстонмен

Уитни Хьюстон бұл әнді Майкл Джексонмен орындамақшы болған екен, алайда, дегені болмады. Кейін әнші Джордж Майклге ұсыныс жасапты. Олар дуэт болып әнді орындап, оған бейнебаян да түсірген. Бір қызығы, олар әнді ешқашан жұрт алдында орындамапты, тіпті, Майкл оны жеке концерттерінде де шырқамаған екен.

 «As» – Мэри Джей Блайджбен

Әнді Стиви Уандер 1976 жылы жазған, оны орындамаған әнші жоқтың қасы. Дегенмен, Джордж Майкл мен америкалық Мэри Джей Блайдж орындаған кавер-нұсқасының орны бөлек. Ән дуэт орындауында 1999 жылы таспаға жазылды және британ синглдарының чартында алғашқы ондыққа енді. Майклдың үздік әндері «Ladies & Gentlemen: The Best of George Michael» аталатын топтамасында әннің британиялық нұсқасы пайда болды. Джордж Майкл аталмыш әннің авторы Стиви Уандермен де бірнеше рет дуэт орындаған. 1985 жылы олар телевизиялық концертте «Love’s In Need Of Love Today» әнін шырқаған еді, талай адамның (оның ішінде, өзіміздің Батырхан Шүкеновтің) кумиріне айналған Стиви Уандер Джордж Майклдың қабілетіне оң бағасын берді.

«Heal The Pain» – Пол Маккартнимен

 
«Heal The Pain» әнін Джордж Майкл 1991 жылы жазды. Ал, 2005 жылы туындыны ұлы музыкант Пол Маккартнимен бірлесе жазды. Кейін, ол Джордждың «Twenty Five» аталатын әндер топтамасына енді. Сол жылы Джордж Майкл мен Пол Маккартни Лондонның Гайд-паркінде өткен Live 8 концертінде The Beatles тобының «Drive My Car» әнін орындады.

«If I Were A Boy» – Бейонсемен 

«If I Were a Boy» әні Бейонсеге арналып жазылған. Ол 2008 жылы шыққан Бейонсенің «I Am... Sasha Fierce» аталатын үшінші студиялық альбомына енді. 2009 жылы концерттердің бірінде Бейонсе осы әнді орындап жатқан жерінен оған Джордж Майкл қосыла кеткен еді. Жиылған қауымның қуанышында шек болмады.