Кофе ағзаға зияны тимеу үшін қалай және қашан ішу керек – дәрігер жауабы

Кофені тамақ ішіп болған соң жарты сағаттан кейін сүтпен ішкен дұрыс, дейді ресейлік диетолог Наталья Нефедова. Ол кофені тамақпен ішкенде не болатынын айтып берді. Бұл туралы Sputnik радиосы жазды.

Таңғы асқа тамақпен бірге кофе ішу қажет емес. Бұл тағамның құрамындағы макро және микроэлементтерді ассимиляциялау процесін бұзуы мүмкін, деп ескертті диетолог.

"Кофенің құрамында металдарды біріктіретін және олардың қалыпты сіңуіне жол бермейтін хелаттар бар. Егер кофені тамақпен бірге ішсеңіз, мырыш, темір, магний ағзада азаяды. Тамақ ішкеннен кейін 30 минут күткен дұрыс", - деп кеңес береді Наталья Нефедова.

Сондай-ақ, кофе ағзадан кальцийді кетіреді. Диетологтың айтуынша, сүт өнімдері шығынның орнын толтыруға көмектеседі.

"Кофе кальцийді жояды, 200 миллиграмм кофеин шамамен 12 миллиграмм кальцийді жояды – бұл шамамен бір кесе кофе. Сондықтан сүт қосылған кофе ішкен дұрыс. Өсімдік сүті де жарайды, бірақ қантсыз болу керек", - дейді диетолог.

Дегенмен, кофеге сүт қосылғанда, сусынның калориялығы артады және ол толыққанды тағамға айналады, деп атап өтті дәрігер.

"500 миллилитр капучиноның құрамында 206 килокалория бар, өйткені сүті көп. Бұл екі кесе кофе дегенді білдіреді. Сүт қосылған бір кесе кофені жеңіл тамақ деп айтуға болады. Бірақ ең қауіпті кофе түрлі тәттілер мен сироп қосылған кофе. Олар қосымша салмақ қосады", - деп ескертті Нефедова.

Айта кетейік, бұған дейін медицина ғылымдарының докторы, профессор, кардиолог Заурбек Шугушев кофенің жүрек-қан тамырлары жүйесіне қалай әсер ететінін және қан қысымы жоғары адамдарға бұл сусынның зияны қандай екенін айтқан болатын.

Дәрігердің айтуынша, қан қысымы жоғары адамдарға кофе ішуді тоқтатудың қажеті жоқ. Бұл сусынның гипертониялық науқастарға теріс әсері аз.

"Кофе шын мәнінде қан қысымының жоғарылауына әкеледі, бірақ өте қысқа мерзімге, дәлірек айтсақ жарты сағатқа ғана", - деп атап өтті кардиолог.

Сонымен қатар, кофе жүрек-қан тамырлары жүйесіне оң әсер етеді, - деді дәрігер.