Giro d'Italia көпкүндігі. Винченцо Нибали көшбасшысында

"Astana Pro Team" шабандозы Винченцо Нибали Джироның таулы 10-кезеңінде мәреге 3-келіп, жалпы есептегі ұпай санын көбейтіп алды.

Ол колумбиялық Ригоберто Ураннан 31 секундқа ұтылып, 13 секундқа тең бонустық ұпайдың арқасында жалпы есепте бірінші орнын сақтап келеді. Енді Нибали екінші сатыда орналасқан австралиялық қарсыласы Кэдел Эванстен 41 секунд алда.

"Эванс мықты шабандоз. Оның қарқынды бір қалыпта ұстап тұру қасиеті мен тауға шығудағы мүмкіндігі алдағы 10 күнде біздің жоспарымызға қарсы ойнауы мүмкін. Джиро күн өткен сайын күрделеніп келеді. Міне, жарыстың екінші аптасы да басталды. Демалыс күнінен кейінгі жарыста күтпеген жағдайдың орын алуы әбден мүмкін, до Монтазио кезеңінде өз бабымды жоғалтпағаныма қуаныштымын. Аньоли біздің топтың қарқынын ұстап тұруға еңбек етті. Соңғы 4 шақырымда  жоғары көтерілу градиенті 20 пайызға жеткенде аяғымның велосипед дөңгелегін айналдыруға күшінің жеткілікті екеніне қуандым, команда жұмысына шексіз ризашылығымды білдіремін", – дейді кезең соңынан кейін Нибали.

"Astana Pro Team" шабандоздары Танел Кангерт пен Валерио Аньоли Корденонстан Монтазиоға дейін созылған 167 шақырымдық жарыс жолының алғашқы бөлігінде-ақ капитанға жұмыс жасап, алға ұзап кеткен 12 шабандозбен арадағы уақытты қысқартуға тер төкті. Аньоли Австрия мен Словения шекарасында орналасқан тауды бағындыру кезінде қарқынды күшейткен шабандоздардың бірі болды.

Дайындаған: Уалихан Қосанбай

Сурет: vesti.kz