Ө.Байділдаев атындағы патриоттық әндер байқауының жеңімпаздары анықталды

23 сәуір күні Қыздар университетінде белгілі музыкатанушы, композитор, профессор Өмірбек Байділдаев атындағы V қалалық «Туған ел» патриоттық әндер байқауы өтті. Бұл туралы «Қыздар университеті» медиа орталығы хабарлады.

Қазақ мемлекеттік қыздар педагогикалық университетінің Өнер және мәдениет факультетіне қарасты мәдени-бұқаралық жұмыстардың теориясы мен әдістемесі кафедрасының ұйымдастыруымен өткен V қалалық ән байқауына Абай атындағы ҚазҰПУ-дың, Т.Жүргенов атындағы өнер академиясының, Ж.Елебеков атындағы Алматы эстрада-цирк өнері мен П.Чайковский атындағы Алматы музыкалық колледжінің және т.б. оқу орындарының студенттері қатысып, бақтарын сынады. Байқауға ҚР еңбек сіңірген әртісі, Құрмет, Парасат орденінің иегері Майра Ілиясова бастаған өнер саласының қайраткерлері қазылық жасады. Қазылар алқасының құрамында сонымен қатар Өмірбек Байділдаевтың туған інісінің ұлы, Т.Жүргенов атындағы өнер академиясының «Кескіндеме және мүсін» факультетінің деканы, профессор, ҚР Еңбек сіңірген қайраткері Бауыржан Байділда болды.

Аталмыш шараның ұйымдастырушысы Мәдени-бұқаралық жұмыстардың теориясы мен әдістемесі кафедрасының меңгерушісі Дана Қарамолдаеваның айтуынша, байқауға қатысуға 30-дан аса жас әнші ниет білдірген. «Ақтық сынға оның 17-і ғана өтті. Университетіміздің құрметті ұстазы Галина Жұмабекқызының бастамасымен ұйымдастырылып келе жатқан байқау биыл бесінші рет өткізіліп отыр. Бұл байқауды ұйымдастырудағы басты мақсатымыз - еліміздің музыка мәдениетінде өзіне тән қолтаңбасымен дараланған кесек тұлғалы композитор, білімді ұстаз, сонымен қатар, зерделі музыка зерттеушісінің шығармашылығы мен әндерін насихаттау және жас талантты әншілердің қолдау, жолдарын ашу», - деді Д.Қарамолдаева.

Қалалық деңгейде өткен байқауды Ректор аппаратының жетекшісі Санат Айнақұлов салтанатты түрде ашты. Алғы сөзінде С.Айнақұлов: «Өмірін өнерімен өрнектей білген Өмірбек Байділдаев біздің оқу орынның Музыка теориясы және тарихы кафедрасының меңгерушісі болып қызмет атқарды. Сол жылдары музыка мәдениетінің тарихы мен теориясын қалыптастыруға өлшеусіз үлес қосып, көптеген әндерімен баға жетпес мұра қалдырды. Оның халық арасында кең тараған «Туған ел», «Қазақстан салтанаты», «Алматым - астанам», «Қимаймын сені», «Ауыл кеші», «Май жыры», «Қыз бен жігіт айтысы», «Жаңа жыл кешінде», «Сұлу екен Алматының қыздары» және т.б сәтті туындылары – Қазақ саз өнерінің қорына қосылған өзіндік мол мұра. Бұл байқау жастарды отансүйгіштікке баулып, туған тіл мен өнерге қызығушылықтарын арттырары сөзсіз», деп атап өтіп қатысушыларға сәттілік тіледі және шараға арнайы қонақ болып келген Өмірбек Байділдаевтың жұбайы Қамила Байділдаеваны оқу орынның мерейтойлық «Құрмет белгісі» медалімен марапаттады.

Үлкен дайындықпен келгенін көрсеткен қатысушылар талап бойынша 2 әннен айтты. Бірінші ән Өмірбек Байділдаевтың шығармашылығынан алынса, екінші ән өз таңдауы бойынша патриоттық тақырыпқа арналды. Үміткерлер әндерді шынайы, табиғи дауыспен, аспаптардың сүйемелдеуімен орындады. Кеш осымен ерекше болды. Үш сағатқа созылған байқауда Байділдаев әндерімен қатар, әр қазаққа ыстық «Атамекен», «Туған ел», «Өз елім менің», «Туған жер» сияқты көптеген патриоттық әндер шырқалды.

Байқау қорытындысы бойынша ән доданың Бас жүлдесіне Т.Жүргенов атындағы Қазақ ұлттық өнер академиясының ІІІ курс студенті Мейрамбек Таганов ие болды. І орынды Т.Жүргенов атындағы Қазақ ұлттық өнер академиясының екі бірдей студенті - «Эстрада-вокал» мамандығының 1 курс студенті Азамат Амангелдіұлы, «Музыкалық драма әртісі» мамандығының 3 курс студенті Айдар Ақыпбаев және П.Чайковский атындағы Алматы музыкалық колледжінің «Академиялық ән салу» бөлімінің 4 курс студенті Мейірбек Балнұр иеленді. Атап өтейік, бас жүлделерді алған жеңімпаздардың барлығы «Бас жүлдеге» лайық болды. Сондықтан қазылар алқасы үшеуіне бірдей бірінші орынды берді. Төрт үздік орындаушы сонымен қатар, Майра Ілиясованың «Сағындырған әндер-ай» концертіне қатысуға мүмкіндік алды. Бұл жолдама жас әншілердің үлкен сахнаға шығуына, бақтарын сынауға, танымал әнші болуға септігін тигізері сөзсіз.

ІІ орынды Қазақ мемлекеттік қыздар педагогикалық университетінің «Музыкалық білім» мамандығының 2 курс студенті Оралғазина Гүлім мен Ж.Елебеков атындағы эстрада-цирк колледжінің «Эстрада вокалы» мамандығының 2 курс студенті Ақиқат Ержанат өзара бөлісті. ІІІ орын Ж.Елебеков атындағы эстрада-цирк колледжінің «Эстрада вокалы» мамандығының 1 курс студенті Ғабидоллаева Айсана мен П.Чайковский атындағы Алматы музыкалық колледжінің «Академиялық ән салу» бөлімінің 4 курс студенті Баймұратов Нұрсұлтанға бұйырды.

Бұдан өзге «Әсем дауыс», «Көрермен көзайымы», «Патриоттық әнді үздік орындаушы» номинациялары бойынша жеңімпаздар анықталды. «Патриоттық әнді үздік орындаушы» аталымына Т.Жүргенов атындағы Қазақ ұлттық өнер академиясының студенттері Зауатбек Асхат пен Қосыбай Мұхтар лайық деп танылса, «Көрермен көзайымы» аталымына Қыздар университетінің студенті «Мәдени-тынығу жұмысы» мамандығының 2 курс студенті Бақыт Байымбетова, «Әсем дауыс» атағына Қыздар университетінің студенті «Музыкалық білім» мамандығының 3 курс студенті Күнімқыз Шералиева ие болды.

Барлық жеңімпаздар дипломдармен және ақшалай сыйлықтармен марапатталды. Аталмыш шара соңында сонымен қатар, байқауға демеушілік көрсеткен Өмірбек Байділдаевтың шәкірті Гүлнар Чимбаева Ректордың Алғыс хатымен марапатталды.

Мәдениетіміздің мақтанышына айналған Өмірбек Байділдаевтың шығармашылығы мәңгілік. Композитордың халық мұрасынан бастау алған әндері мен күйлері – бүгінгі ұрпақ үшін де, келешек ұрпақ үшін де сарқылмайтын мол рухани қазына болып қала бермек. 

Өмірбек Байділдаев 1932 жылы, 10 мамырда Жамбыл облысының, Қордай ауданындағы «Күнбатыс» деген жасыл желекті, көрікті ауылда дүниеге келген. 1954 жылы Қазақстанның халық әртісі Р.Омаровтың домбыра сыныбы бойынша Құрманғазы атындағы Қазақ ұлттық консерваториясын бітірген. 1954-1965 жылдары Қазақ ҚСР-і телерадио хабарларын тарату жөніндегі мемлекеттік комитетінің музыка редакциясының редакторы, бас редакторы және көркемдік жетекшісі қызметтерін атқарған.

1967-1997 жылдары Қазақ Мемлекеттік Қыздар педагогикалық университетінде, Музыка теориясы және тарихы кафедрасының меңгерушісі, доцент, профессор қызметтерін атқарды. Білікті ұстаз, тәлімді тәрбиеші болған Ө.Байділдаев педагог кадрлар даярлауда да өнегелі жұмыстар жасады. Оған осы еңбегі үшін профессор атағы берілді. 1970 жылы «Ерен еңбегі үшін» медалімен марапатталды. Өмірбек Байділдаев ғылыми-педагогикалық салада профессор атағына ие болса, қаламгерлік жолда – Журналистер одағына мүшесі, ал, сазгерлік салада – Композиторлар Одағына мүшесі болып жемісті жұмыстар атқарды.

Сурет: Қыздар университеті