Әлем чемпионын жеңген Марина жартылай финалға шықты

75 келі салмақта өнер көрсететін қазақстандық Марина Вольнова бокстан жартылай финалға шықты.

Ширек финалда британдық Саванна Маршалмен қолғап түйістірген отандасымыз 16:12 есебімен жеңіске жетті. 

Кездесу алғашқы минуттардан-ақ тартысты басталды. Алғашқы раундта қарсыластар бір-біріне нәтижелі шабуылдар жасап, тең тарасты. Есеп 4:4. Екінші раундта 23 жастағы отандасымыз бірнеше нәтижелі шабуыл жасағанымен, британдық боксшы да дес бермей қарымта шабуылдар жасап үлгерді. Бұл жолы 3:3. Аздаған үзілістен соң Қызылорда қаласының тумасы Марина Вольнова ойын тізгінін өз алып, үшінші раундты 3:1 есебімен өз пайдасына шешті. Шешуші раундта қазіргі әлем чемпионы - Саванна Маршал есеп айырмасын қысқарутға барынша тырысты. Алайда, біздің Марина қарсыласқа өз басымдығын анық байқатты. Нәтижесінде соңғы екі минуттықты 6:4 есебімен жеңген Марина Вольнова жартылай финалға жолдама алды. 

Енді, Марина Вольнова 8 тамыз күні Астана уақытымен сағат 19:30-да Шиелдс Кларессамен шаршы алаңда күш сынасады. 

Дайындаған: Ғани Тұрғынбеков

Сурет: london2012.com