Денсаулық сақтау министрлігі жаз мезгіліне байланысты азаматтарға ескерту жасады, - деп хабарлайды Massaget.kz тілшісі.
Күн жылынуына байланысты жіті ішек инфекциясын жұқтыру қаупі артады. Ол - асқазан мен ішек жолдарын зақымдап, ағза улануына әкелетін жұқпалы аурулар тобы.
Аурудың негізгі белгілері:
- жүрек айну, құсу;
- іш өту;
- іш ауруы;
- дене қызуы көтерілуі;
- әлсіздік;
- ағза сусыздануы.
Мамандар аурудың алдын алу үшін тамақ ішер алдында және дәретханадан кейін қолды сабынмен жууды ұсынады. Сондай-ақ, жемістер мен көкөністерді мұқият жуып, тек қауіпсіз ауызсуды тұтыну қажет.
Бұдан бөлек, азық-түлікті сақтау талаптарын ескеру, ет, балық және жұмыртқаны әбден пісіру, сондай-ақ, рұқсат етілмеген сауда орындарынан тамақ сатып алмау маңызды.
Ішек инфекциясының белгілері байқалған жағдайда дәрігердің көмегіне жүгінген жөн.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова