Google-дың негізін қалағандар компаниядан кетті

Google-дың негізін қалағандар компаниядан кетті

Google іздеу жүйесін жасап, компанияның негізін қалаған Ларри Пейдж бен Сергей Брин Alphabet (Google Inc-тің холдингі) компаниясындағы қызметтерінен кетіп, компанияны Google-дың бас директоры Сундар Пичаи басқаратыны белгілі болды. Ларри Пейдж бен Сергей Брин Стэнфорд университетінде танысып, 1998 жылы бірігіп Google атты интернет-компанияны құрған еді.

Енді компанияны Alphabet холдингінің басшысы Сундар Пичаи басқарады.

Image result for сундар пичаи"

Сундар Пичаи 1972 жылы 12 шілдеде Үндістанның Ченнай қаласында дүниеге келген. Стэнфорд университетінің стипендиаты атанған соң, 1993 жылы АҚШ-қа қоныс аударған. MBA дипломын алып, Applied Materials, McKinsey & Co компанияларында жұмыс істеп үлгерген Сундар Google-ге 2004 жылы келді.

Сундар Пичаи 2004 жылдың 1 сәуірінде қатардағы жұмыскер ретінде қабылданды. Дәл осы кезде компания Gmail-ды іске қосып жатқан еді. Жұмысқа қабылданған соң, оған дәл осы сервисті дамыту тапсырылады.

Сундар кейін Google-тулбармен айналысады. Кейін ол басшылыққа Google Chrome браузерін жасауды ұсынады. Басында компания басшылары бұл идеяны қолдамайды. Алайда Сундар мен 10 инженер Chrome-ды жасырын жасап, басшылыққа ұсынады да, ақыры 2008 жылы Google Chrome іске қосылады. Қазіргі таңда қолданушылардың 67%-і интернетке осы браузермен кіреді. Google Chrome жобасынан кейін Сундардың қызметі өсе бастайды. 2008 жылы ол өнім жасау бойынша вице-президент, 2012 жылы Google Chrome мен фирмалық қосымшалардың вице-президенті болады. Кейін Android жүйесін, Google Drive, Google Maps-ты дамытумен айналысады. 2009 жылы Twitter оны командасына шақырады, алайда Google бейресми дерек бойынша 10-50 миллион аралығында доллар төлеп, қалдыруға көндірген. 2014 жылы оны Microsoft бас директорлыққа шақырады.

2015 жылы Google-дың негізін салушылар Ларри Пейдж бен Сергей Брин Alphabet компаниясын құрып, Google оның еншілес компаниясына айналып, оның бас директорлығына Сундар Пичаи барады. Енді 47 жастағы Сундар Пичай Google-мен қатар Alphabet-ті де басқарады.

Google-дың негізін қалаушылар Alphabet-те директорлар кеңесінің мүшесі, акционер ретінде компанияның дамуына атсалыса бермек.

"Егер компаниямыз  адам болса, 2019 жылы 21 жасқа толар еді. Бұл АҚШ-та кәмелетке толған адам саналады. Баламыздың ұясын тастап шығатын уақыт келді", – деді Пейдж бен Брин.

Massaget.kz