Мотоцикл түрлері және ерекшеліктері

Әрбір ер жігіт толысып, бойына күш-қуаты дарығанын сезінген сәтте, адреналин алатын нәрселерге қызыға бастайды. Парашюттен секіру, көліктің жылдамдығын арттыру және мотоциклге құмарту секілді көптің көңіліне қорқыныш ұялататын нәрселерге бас алмай кіріп кеткісі келіп тұрады. Бүгінгі әңгімеміз жаз мезгілінде ғана құйындай зулайтын екі дөңгелекті мотокөліктер туралы болмақ. Мұндай керемет тұлпардың қандай түрлері бар екенін және қандай болатынын сөз етейік.

Әдетте сырт көзге түкке тұрғысыз дүние болып көрінгенімен, мотоциклдердің де бағасы шарықтап тұрғаны рас. Қалтаңыз жұқа болса, өзіңізге ұнаған тұлпарды тақымдау оңайлықпен бұйырмайды. Сондықтан арнайы мото дүкендерге барғанда қалтаңызға қарай таңдағаныңыз дұрыс. Оның үстіне егер сіз қымбат тұлпар алғанның өзінде, арнайы киім мен басыңызға бас киімін алатыныңызды ұмытпаңыз. Өміріңізді қорғайтын нәрселер болғандықтан нашар өнімдерді тұтынудан бас тартыңыз. 

Ең бірінші барлығыңыздың ойыңызға қытайлық мотоциклдер түсетіні рас. Бағасы едәуір арзан, қол жетімді болғандықтан тұтынушылары да көп. Мұндай қос дөңгелекті көліктер өте тиімді. Қаладағы кептелістен оңай сытылып шығып, баратын жеріңізге жылдам жеткізеді. Алайда, қытайдың өнімдері сапасыз екенін де есіңізге сала кетейік. Жылдамдықты шамадан тыс асырғанда тежегіші істен шығып немесе басқа бір ақау пайда болса, өмір бақи мүгедектер арбасына таңылып қалуыңыз ғажап емес. Сондықтан сатып алған жағдайда жиі тексеріп тұрғаныңыз дұрыс. 

Классикалық үлгідегі мотоциклдер – нағыз жанның рахаты. Себебі онымен көше кезіп жүрудің өзі бір мақтаныш саналады. Жылдамдықты қажет етпейсің. Ұзақ жылдан бері сақталып келе жатқан темір тұлпарлар өз құндылығын еш уақытта жоғалтқан емес және болашақта да жоғалтпайды. 

Спорттық үлгідегі мотокөлік. Адам бойындағы сенімділікті арттырып, барынша жылдам жүруге итермелейді. Мұндай көлікке бір үйренген жанның басқа темір тұлпарларға мүлде көз салғысы келмейтіндігі жиі айтылады. Алайда, мотоцикл қателікті кешірмейді. Мұндай камикадзелердің өздерінің арасында "Өмір – бір-ақ рет беріледі" деген нақыл сөздері бар. 

Туристерге арналған мотоцикл. Мұндай қос дөңгелекті көліктер көбіне еуропа елдерінде пайдаланылады. Салқындатқышы, сөмке салғышы бар ыңғайлы көлік қыдырып барған жандардың қаланы аралағанда немесе ұзақ жолдарға сапарға шыққанда пайдасы орасан зор.