Жеңіл атлетика жарыстарында Nike аяқ киімімен жүгіруге тыйым салынды

2019 жылы 12 қазанда марафоншы Элиуд Кипчоге алғаш рет 42 километр 195 метрді 1 сағат, 59 минут, 40,2 секунд ішінде жүгіріп өтіп, марафон рекордын жаңартты. Ол Nike Vaporfly кроссовкасымен жүгірген еді. Жеңіл атлетика ассоциациясы бұл аяқ киімді "технологиялық допингке" балап, енді марафонда киюге тыйым салды.

Ассоциацияның айтуынша, Nike-дің мұндай аяқ киімі спортшыға қосымша серпіліс береді. Сондықтан ол 4% жылдамырақ жүгіреді. Тыйым 2020 жылдың 31 қаңтарынан бастап күшіне енеді.

Жеңіл атлетика ассоциациясы жарыстарда спортшының физикалық дайындығы емес, техникалық құралдары, киімі үлкен маңызға ие болып кете ме деп қауіптенеді. Олар 2020 жылы өтетін Токио Олимпиадасында бұл үрдісті жіті назарда ұстамақ.

Бұған дейін Оскар Писториус спортшыға қосымша күш беретін жабдықтың құрбаны бола жаздады. Ол протезбен жүгіреді. Ал оның серіппелі қасиеті бар. Сондықтан Жеңіл атлетика ассоциациясы оны жарыстарға қатыстырмау туралы шешім қабылдайды.

Бірақ сот Писториусты шектеуге қарсы болып, оны спортта қалдырады. Өйткені ассоциация талабына сай протез жоқ.