Мемлекет басшысы кәсіпқой боксшы Қанат Исламды қабылдады

Мемлекет басшысы кәсіпқой боксшы Қанат Исламды қабылдады
Фото: akorda.kz

Қазақстан Республикасы Президенті Қасым-Жомарт Тоқаев кәсіпқой боксшы Қанат Исламды қабылдады, - деп хабарлайды Ақ орда.  

Кездесу барысында еліміздегі кәсіпқой боксты және балалар мен жасөспірімдер спортын, соның ішінде ауылдық жерлерде бокс үйірмелерін дамыту мәселелері талқыланды.

Орта салмақтағы WBO Inter-Continental белбеуінің иегері Қанат Ислам Қасым-Жомарт Тоқаевқа еліміздің спортшыларына қолдау көрсеткені үшін алғыс айтты.

Мемлекет басшысы боксшының алдағы өтетін жекпе-жектерде жеңіске жетуіне тілектестігін білдірді. 

Қанат Ислам жекпе-жек өткізгеніне де көп болған жоқ. 5 шілде күні Алматыда Доминика Республикасынан келген Хулио де Хесуспен қолғап түйістірді. Қарсыласын 14 секундта нокаутқа түсіріп, отандастарымызға жарқын жеңіс сыйлады. 

Н. Үсенова