Геннадий Головкин қарсыласы Стив Роллсты нокаутқа түсіріп жеңіске жетті. Бұл – GGG мансабындағы 39-жеңіс. Шоу Нью-Йорктегі Madison Square Garden аренасында өтті.
74,4 келіге дейінгі орта салмақта жұдырықтасқан спортшылар арасындағы жекпе-жек төрт раундқа созылды. Төртінші раундта Геннадий Головкин Стив Роллсқа жойқын соққылар жасап, нокаутпен жеңді.
Бұл – Геннадий Головкиннің DAZN стриминг сервисімен келісімшарт аясындағы алты кездесуінің алғашқысы. Бұған қоса, жаңа бапкері Джонатан Бэнкстің жаттықтыруымен алғаш рет жұдырықтасып отыр.
Бұған дейін Геннадий Головкиннің табысы 2 миллион доллар делінген, бірақ ESPN басылымы оның кездесуден кейін алатын табысы 15 миллион АҚШ долларына дейін жетеді деген еді.
Бокс кешінде Головкинмен бірге қазақстандық Әли Ахмедов пен Бақтияр Эюбов та жұдырықтасты. Әли Ахмедов америкалық Маркус Макдэниэлді нокаутқа түсіріп, WBC титулын жеңіп алды. Бұл – оның мансабындағы 15-жеңіс.
Ал Бақтияр Эюбов америкалық Брайан Себальодан жеңіліп қалды. Жеңімпаз төрешілер шешімі бойынша анықталды. Олар америкалық боксшыны бірауыздан жеңімпаз деп атады. Есеп: 79-73, 78-74 және 80-72. 32 жастағы Бақтияр Эюбов алғаш рет жеңіліп отыр. Бұған дейін ол 14 кездесу өткізіп, оның 12-сін нокаутпен жеңіп, бір кездесуде тең түскен еді.