Еуропа лигасының финалына шыққан клубтар анықталды (видео)

Еуропа лигасының финалына шыққан клубтар анықталды (видео)
Фото: framtidinord.no

Футболдан Еуропа лигасының финалына шыққан ұжымдар белгілі болды. Түнде өткен қарымта кездесулерде «Фиорентина» «Севильяға» екінші рет есе жіберсе, «Днепр» өз алаңында «Наполиді» ұтып кетті.

Чемпиондар лигасынан бір бас төмен тұратын Еуропа лигасы да тартысты кездесулерге толы. Өткен маусымда бұл додада «Севилья» (Испания) топ жарған болатын. Биыл да Унай Эмери жаттықтыратын ұжым финалға жетіп отыр. Олар бірінші бірінші ойында Италияның «Фиорентина» клубын 3:0 есебімен жеңсе, түнде өткен Флоренциядағы кездесуде 2:0 есебімен жеңіске жетті.

Еуропа лигасының финалына Украинаның «Днепр» клубы шығады деп көпшілік күтпеген еді. Бірақ, украиналық клуб ерледі. Түнде өткен ойында алаң иелері 58 минутта Евгений Селезнев соққан голдың нәтижесінде финалға өтті. Бірінші ойында да осы шабуылшы төрешілер қателігінен кейін офсайдтан гол соққан болатын. Неапольдағы ойында 1:1 есебі тіркелген-ді. Сол ойында өрескел қателік жіберген норвег төрешілері 2016 жылғы Еуропа чемпионаты ойындарына қазылық жасаудан шеттетілуі мүмкін.

Айта кетейік, Еуропа лигасының финалы 27 мамыр күні Польша астанасы Варшавада өтеді.  

Ө. Сансызбай