Головкин кімдермен жұдырықтасқысы келеді?

Орта салмақта WBA және IBO тұжырымдары бойынша әлем чемпионы, WBC аталымының уақытша чемпионы белбеуінің иегері отандасымыз Геннадий Головкин алдағы уақытта кімдермен шаршы алаңда жекпе-жек өткізгісі келетінін жеткізді.

GGG Мигель Коттомен жұдырықтасуды маңызды санайды. Өйткені, пуэрто-рикалық боксшы WBC тұжырымы бойынша әлем чемпионы атағына ие.

- Мен Коттомен жұдырықтасқым келеді. Бұл жекпе-жек мен үшін маңызға ие. Өйткені, Мигель Котто Серхио Мартинесті жеңу арқылы WBC тұжырымындағы чемпиондық атаққа ие болды. Мен Серхиомен жұдырықтаса алмадым. Сол себепті оны жеңген боксшымен шыққым келеді, - деді Геннадий.

Отандасымыз Мигель Коттодан өзге де танымал былғары қолғап шеберлерімен жекпе-жек өткізуден қашқақтап отырған жоқ.

- Сауль Альварес те мықты боксшы. Оны мексикалық аңыз деп атауға лайық. Кіші Чавеспен де жақсы жекпе-жек өткізуге болады. Біз онымен келісімге келуге талпындық, бірақ ол жұдырықтасуды қаламайтын сыңайлы. Фроч та осал қарсылас емес. Бұлардың барлығы атақты боксшылар, ал мен атақты боксшылармен жұдырықтасуды қалаймын, - деді.

Айта кетейік, Геннадий Головкин кәсіпқой бокстағы 32-ші жекпе-жегін 2015 жылдың 21 ақпанында Монакода өткізеді. Қарсылас – британдық Мартин Мюррей. Осыған дейін К2 Promotions пен Golden Gloves промоутерлік компаниялары қос былғары қолғап шеберінің шаршы алаңда кездесуіне келісім жасаған-ды. GGG промоутері Том Леффлер жерлесіміздің тек АҚШ жерінде ғана емес, Еуропада да жекпе-жек өткізуін маңызды санап отыр.

Cурет: sport.gazeta.ru